اسلام آباد۔ 26 نومبر (اے پی پی) پاکستان و بیلاروس زرکاری، کشت وکشار، واپار، دفاع تون اوار ایلو بشخ آتیٹی کمکاری ءِ ودفنگ نا گرج آ زور شاغسا تین پہ تینی معاہدہ و مفاہمت نا یات داشت آتے زوت عملی ءُ دروشم اس تننگ آ امنا کرینو، ہڑتوم آ کنڈآتا گڈیکو معاہدہ و مفاہمت نا یات داشت آتیا فروری 2025 اٹی دستخط کننگک۔ سےشنبے نادے آ اسیجائی نیوز کانفرنس آن تران کرسا وزیراعظم محمد شہباز شریف بیلاروس نا صدر الیگزینڈر لوکاشینکو و اونا ڈل انا دورہ ءِ پاکستان نا ستاءِ کرسا پارے کہ بیلاروس نا صدر 8 سال آن پد ولدا آن پاکستان نا دورہ ءِ کننگ اٹی ءِ، اوپاکستان نا عظیم سنگت ، مدبر و بصیرت افروز راہشون ءِ، پاکستان نا الس بیلاروس ءِ تینا خڑک انا سنگت تکرہ و اونا کمکاری آ منت وار و سرکڑدہ ءِ شرف نا نظر اٹ ہریرہ، پاکستان بیلاروس نا صدر نا ارٹ میکو اُرا ءِ ، اونا دورہ ٹی ون آن ون و ڈل آتا کہول آ جوان گپ وتران مسنے، بیلاروس نا صدر نا خیال و اواری اٹ کاریم کننگ نا عزم و معاہدہ ننکن است بڈ ءِ، ہڑتوم آملک آتا نیام اٹ گپ وتران اٹی زرکاری ، واپار، سیل وسوات، دفاع تون اوار ایلو اہم بشخ آتیٹی کمکاری و اہم ایشوز آتا پورو احاطہ ءِ کننگا۔ اوپارےکہ بیلاروس تون مروک آ معاہدہ غاتے دمدستی عملی دروشم اس تننگک وخت اس کہ اسہ ایلو نا آزموندہ غاتیان فائدہ ہرفنہ۔ اوپارے کہ ہڑتوم آ پلوآک اواری اٹ تولسا روڈ میپ ءِ گڈیکو دروشم اس ایترہ۔ کشاری مشینری و آئی ٹی، معدنیات اٹی کمکاری ءِ ودفنگ و جائنٹ ونچر ءِ مون آ دننگک۔ وزیراعظم پارے کہ اِراہفتہ غان پد دُوارہ ہڑتوم آ کنڈآتا ٹیم تا اوڑدہی مریک و داگپ وتران ءِ عملی دروشم اس تننگ کن گڈیکو گام گیج کننگک اوکان پد فروری 2025اٹی بیلاروس اٹی صدر بیلاروس و ای دامعاہدہ غاتیا دستخط کینہ و اوفتے ہڑتوم آملک آتا فائدہ ٹی عملی ءُ دروشم اس ایتنہ۔ نن اسہ ایلو نا کاریم نا کچ ولائخی تیان فائدہ ہرفنہ۔ وزیراعظم پارے کہ فلسطین اٹ اسرائیلی جارحیت نا ترندی اٹ مذمت ءِ کینہ، غزہ ٹی زالبول، چناتتون اوار 45 ہزار بندغ شہید کننگانے، شار انا شار ءِ بھس کننگ انگ ءِ، اقوام متحدہ نا قرارداد و جہانی عدالت انصاف نا فیصلہ غان پد ہم سیز فائر مننگ کتو۔ اوپارے کہ بیلاروس آن کشمیری الس نا حق خودارادیت نا دوئی کننگ اوفتا جہد نا مخ تفی نا خواہندار اُن۔ 75 سال گدرینگ انگ آن پد ہم کشمیری تے اوفتا بنداوی حق ءِ تننگتنے۔ داڈیہہ انا امن کن کشمیرنا جھیڑہ نا ایسر المی ءِ۔ بیلاروس نا صدر الیگزینڈر لوکاشینکو وزیراعظم و حکومت پاکستان نا کنڈآن اونا جم وجوش اٹ بیابخیر و مہمانداری آ منت واری ءِ ہرفسا پارے کہ پاکستان و بیلاروس نا نیام اٹ سوگو تعلقداری جوڑ ءِ، ہڑتوم آ کنڈآک گپ وتران اٹی آخبت نا روڈ میپ آ گپ وتران آن بیدس کیہی معاہدہ و مفاہمت نا یات داشت آتیا دستخط کریر۔ شہباز شریف تون اوڑدہی ٹی اودے عملی و گچین انسان آ خنا، وزیراعظم شہباز شریف نا مثبت سوچ نا نن معترف اُن، وزیراعظم اوڑدہی ٹی معاہدہ و مفاہمت نا یات داشت آتے زوت عملی دروشم اس تننگ نا گرج آ زور شاغا وخت اس کہ فروری ٹی دا معاہدہ غایا باقاعدہ دستخط مریک۔ صدر بیلاروس پارے کہ ننے ساڑی آ دور انا خواست آتا رداٹ پوسکن آ ڈٹ آتیا عمل کروئی مریک، نن اسہ پوسکنءُ روڈ میپ اسے آ کاریم کننگ اُن، داٹی نن پوسکن آ گرج آتیا سجفنگ اُن ، پاکستان و بیلاروس نا نیام اٹ 30 سال آن سفارتی تعلقداری جوڑ ءِ، ننے سفارتکاری ٹی تعمیری گام گیج آتے مون آ دروئی مریک، ساڑی آ دورہ ٹی ٹرانسپورٹ ولاجسٹک کوریڈور اٹی بشخ ہلنگ تون اوار ایلو باندات آتیا ہم گپ وتران کننگانے۔ السی گچینی نا ڈٹ آتیا عمل کروئی مریک، پاکستان نا ٹیکسٹائل و ایلو برآمد آتیان بیلاروس فائدہ ہرفک، نن ٹیکنالوجی ناپڑاٹ اسہ ایلو کن کمکار مننگ کینہ ، کشت وکشار و دفاعی پیدوار اٹی کمکاری ءِ ودفوئی مریک۔
