اسلام آباد۔ 26 نومبر (اے پی پی) وزیراعظم محمد شہباز شریف و بیلاروس نا صدر الیگزینڈر لوکاشینکو نا نیام اٹ ہڑتوم آ کنڈآتا اوڑدہی مسنے۔ اوڑدہی ٹی ہڑتوم آ راہشونک تین پہ تینی فائدہ مند کمکاری و اقتصادی وواپاری تعلقداری تے پین سوگو کننگ نا عزم انا درشانی ءِ کرینو۔ سے شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف وزیراعظم ہاؤس آ بننگ آ بیلاروس انا صدر لوکاشینکو ءِ بخیرکرے۔ صدر لوکاشینکو پاکستان اٹ جم وجوش اٹ بیابخیری و مہمانداری آ وزیراعظم نا منت واری ءِ ہرفے۔ داوخت آ وزیراعظم پارےکہ پاکستان بیلاروس اتون تینا تعلقداری تے قدر انا نظر اٹ ہرک، نادادورہ ہڑتوم آملک آتا نیام اٹ کمکاری و شریداری نا پوسکن آ کسر تے ملنگ اٹ بھاز کمکار مریک۔ ہڑتوم آ کنڈآتا اوڑدہی ٹی سیاسی تعلقداری، واپار و زرکاری ، دفاعی کمک و علاقائی ویل آتون اوار چندی سرحال آتیا گپ وتران کننگا۔ ہڑتوم آ راہشونک تدوک آ دہائی ٹی پاکستان و بیلاروس تعلقداری نا غٹ پلو آتیٹی مثبت پیش رفت آ است جمی نا درشانی ءِ کریر، تین پہ تینی فائدہ مند کمکاری و اقتصادی و واپاری تعلقداری تے پین سوگو کننگ نا عزم انا درشانی ءِ کریر۔ وزیراعظم بیلاروس نا صدر ءِ حکومت پاکستان نا برآمد آتیاتالان نمو و سنگت ملک آتیان زرکاری ءِ اتنگ نا کمک اٹ پاکستان نا اقتصادی بحالی نا پالیسی نا بارواٹی معلومدار کرے۔ ہڑتوم آراہشونک جہانی و علاقائی پیش رفت آہم گپ وتران کریر۔
