اسلام آباد۔ 26 نومبر (اے پی پی) وزیراعظم محمد شہباز شریف سری نگرہائی وے آ برانزی تا کنڈآن رینجرو پولیس کارندہ غاتیا گاڈی اٹ جلہو نا ترند انگالوز آتیٹی مذمت ءِ کرسا پارینے کہ بے چیٹی ٹولہ کانود نافذ کروک آ ادارہ غاتے دانستہ وڑاٹ شست کننگ ءِ، پاکستان بے چیٹی و خون ریزی ءِ سگنگ کپک، ناپاک سیاسی مسخت آتیکن خون ریزی ءِ منپنہ۔ سے شنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف جلہو اٹی گاڈی اٹ لتاڑوک آ رینجر کارندہ غاتا شہیدی آ ڈکھیائی و است ہسونی نا درشانی ءِ کرے۔ وزیراعظم شہید کارندہ غاتا درجہ غاتا بڑزی و اوفتا خاہوت کن صبر وجمیل نا دعاکرے۔ وزیراعظم واقعہ ٹی اوار بندغ آتا دمدستی پیدواری ءِ کرسا اوفتے سخت سزاترفنگ نا پارت کرے۔ وزیراعظم جلہو اٹی ٹھپی مروک آ رینجرز و پولیس کارندہ غاتے گچین طبی آسراتی فراوان کننگ نا پارت ہم کرے۔ وزیراعظم پارے کہ پن انا پرامن برانز نا آڑ اٹی پولیس و رینجرزنا کارندہ غاتیا جلہو قابل مذمت ءِ، بے چیٹی ٹولہ کانود نافذ کروک آ ادارہ غاتے دانستہ وڑاٹ شست کننگ ءِ، پولیس و رینجرز نا کارندہ غاک شاراٹی امن وایمنی نا نفاذ کن سلوک ءُ۔ وزیراعظم پارے کہ بے چیٹی ٹولہ نا دوتے اٹ شہید سیکورٹی کارندہ غاتا خاہوت آتا زند آتے بھس کننگا، بے چیٹی ٹولہ تدوک آ دے پولیس کارندہ و اینو شہید کروک آ رینجرز کارندہ غاتا کودک چناوخاہوت آتے جوابدہ ءُ۔ وزیراعظم پارے کہ بے چیٹی ٹولہ انقلاب آخا خونریزی خواہک، داپُرامن برانز آخا شدت پسندی اسے و پاکستان بے چیٹی و خونریزی ءِ سگنگ کپک، ناپاک سیاسی مسخت آتیکن خون ریزی ناقابل قبول و بھاز مذمت نا قابل ءِ۔ وزیراعظم پارے کہ کنتون اوار مچ آ قوم شہید مروک آ رینجرز و پولیس نا کارندہ غاتے خراج عقیدت پیش کیک۔
