مزن وزیر شہباز شریف ءِ ڈل ءِ تک ءَ امیر گتر ءِ گوما گند ءُ  نند ءَ وت مہ وتی تجارت، سرمایہ کاری، توانائی ءُ  دود ءُ  ربیدگ ءَ ھوار جتا جتائیں شوبگ آنی تہ ءَ کمک ءَ را دیمروئی دیگ ءُ  اسٹریٹجک سیادی ءَ را گیش کنگ ءِ جزم ءِ  درشان

دوحہ۔31اکتوبر  (اے پی پی):پاکستان ءُ گتر ءَ تجارت، سرمایہ کاری، توانائی ءُ  دود ءُ  ربیدگ ءَ ھوار جتا جتائیں شوبگ آنی تہ ءَ وت مہ وتی کمک ءَ را گیش کنگ ءُ  اسٹریٹجک سیادی ءَ را گیش کنگ ءِ واستہ وتی جزم ءِ یک رندے پدا پدر کتگ۔ پنچ شمبے ءِ روچ ءَ مزن وزیر کارگس ءِ پریس ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ دوحہ ءَ ڈل ءِ تک ءَ گتر ءِ امیر شیخ تمیم بن حمد الثانی ءَ گوں گند ءُ  نند کتگ۔ ایشی ءَ چہ پیسر دوئیں رہشون آنی نیام ءَ یک پہ یک ءَ گند ءُ  نند ھم برجم دارگ بوت کہ ایشی ءِ تہ ءَ دو نیمگی سیادی آنی سر ءَ مزنیں کساسے ءَ گپ ءُ  تران کنگ بوت۔ گند ءُ نند ءِ ساھت ءَ دوئیں راہشوناں پاکستان ءُ گتر ءِ سیادی ءِ درستیں تک ءُ پھناتانی سر ءَ سرجمی ءَ چار ءُ تپاسی کتگ۔ تجارت، سرمایہ کاری، توانائی ءُ دود ءُ ربیدگ ءِ شوبگ ءَ کمک ءَ را گیش کنگ ءِ واستہ نوکیں ممکنہ کمک ءِ سر ءَ ھم ھیال ءُ لیکہ کنگ بوت۔ فریقین ءَ اسٹریٹجک دو نیمگی سیادی آناں گیش وسعت دیگ ءِ وتی جزم ءِ پدا زور دات ءُ  یکجائی اقتصادی مول ءُ  مراد ءُ  دمگی استحکام ءِ ارزشت ءِ سر ءَ زور پر دات۔ ایشاں دمگی ءُ میاں اوستمانی جیڈھ آنی سر ءَ ھم گپ ءُ تران کتگ ءُ ھاسیں رنگ ءَ اسرائیل ءِ بے گناھیں فلسطینی آنی ھلاپ ءَ برجاھیں نسل کشی جنگ ءُ دمگ ءِ تہ ءَ کش ءُ چیل آنی گیش بوھگ ءِ سر ءَ ھم گپ ءُ تران کتگ۔ مزن وزیر ءَ 24ستمبر 2024 ءَ اقوام متحدہ ءِ جنرل اسمبلی ءِ 79می سالی دیوان ءِ ساھت ءَ امیر گتر ءِ نیمگ ءَ پیش کتگیں فلسطین ءِ جیڈھ ءِ سر ءَ گتر ءِ موقف ءِ توسیپ کت۔ آئی ءَ گتر ءِ ترندیں جنگ بندی ءِ میانجی داری ءُ  بے رکاوٹیں انسانی کمک ءِ پجارینگ ءِ کوشست آناں ھم ساڑات۔ مزن وزیر محمد شہباز شریف ءَ گوشت کہ غزہ ءَ کشت ءُ  تباہی ءِ زوتیں ھلاسی ءُ  امن ءِ برجائی ءَ ابید دگنیا ءَ وشھالی ءِ پجارینگ ممکن نہ انت۔ آئی ءَ گوشت کہ فلسطین ءِ تہ اسرائیل ءِ انوگیں ظلم ءُ  زوراکی راجدپتر ءِ تہ ءَ بے درور اِنت گند ءُ  نند ءِ ساھت ءَ دوئیں رہشون آنی تہ ءَ فلسطینی برات ءُ  گھار آناں گیش ءَ چہ گیش کمکی سامان آنی سر کنگ ءِ برجائی ءِ سر ءَ ھم گپ ءُ  تران بوت۔ مزن وزیر ءَ امیر گتر ءَ را پاکستان ءِ تر ءُ  تاب ءِ دعوت ھم دات۔ مزن وزیر محمد شہباز شریف ءِ گتر ءِ تر ءُ تاب دوئیں اسلامی براتی ملکانی نیام ءَ مدام مھکم بوھوکیں شریکداری ءُ کمک ءِ گیش کنگ ءِ دگہ سنگ میل اِنت۔