صدر آصف علی زرداری ءَ پاکستان ءُ ترکمانستان ءِ نیام ءَ اقتصادی کمک ءُ کاروباری سیادی آنی تہ ءَ گیشی ءِ ارزشت ءِ سر ءَ زور پر دات

اسلام آباد۔16اکتوبر  (اے پی پی):صدر ءِ مملکت آصف علی زرداری ءَ پاکستان ءُ   ترکمانستان ءِ نیام ءَ اقتصادی کمک ءُ   کاروباری سیادی آنی تہ ءَ گیشی ءِ سر ءَ زور پر دات تانکہ دوئیں ملک آنی وت مہ وتی سیت ءَ را دل یکیمی کنگ بہ بیت۔ آئی ءَ اقتصادی کمک ءَ را گہتر کنگ ءِ واستہ دوئیں براتیں ملک آنی اسٹاک ایکسچینج آنی نیام ءَ گیشیں سیادی ءِ سر ءَ ھم زور پر دات صدر ءِ مملکت ءِ ایوان ءِ پریس ونگ ءِ نیمگ ءَ جاڑی بوتگیں بیان ءِ رد ءَ ترکمانستان ءِ کابینہ ءِ نائب چیئرمین راشد میریدوف ءَ اے ھیال آنی درشانی کتگ۔ صدر ءِ ایوان ءَ گپ ءُ تران کنان ءَ آئی ءَ پاکستان ءَ ترکمانستان ءِ سفیر اتاجان مولویف ءِ گوما ریاست ءِ صدر ءَ گوں گند ءُ نند کتگ۔ صدر ءِ مملکت ءَ ڈل ءَ را وش اتک کنان ءَ گوشت کہ پاکستان ترکمانستان ءِ گوما وتی سیادی آناں سک باز ارزشت دنت کہ ایشانی بنیات یکجائی اقدار، مذہب ءُ   دود ءُ   ربیدگ ءِ سر ءَ انت۔ آئی ءَ پڑ ءِ یکجائی وشھالی ءُ برجائی ءُ پاکستان ءُ ترکمانستان ءِ اُلس ءِ گہتری ءِ واستہ یکجائی ءَ کار کنگ ءِ ضلورت ءِ سر ءَ زور پر دات۔ صدر ءِ مملکت ءَ ٹاپی گیس پائپ لائن منصوبگ ءِ زوت سرجمی ءِ واستہ پاکستان ءِ جزم ءِ یک رندے پدا گوشت کہ اے منصوبگ ءَ چہ دوئیں ملک آنی اقتصادی دیمروئی ءَ سک باز کمک رسیت۔ راشد میریدوف ءَ اشگباد ءَ مگتی مولی فرگی ءِ 300می سالروچ ءِ مراگش ءِ سر ءَ میاں اوستمانی فورم ءَ بھر زوری ءِ سر ءَ صدر ءِ منت گپت ءُ   گوشت کہ اے ترکمن راج ءِ احترام ءِ مزنیں اشارہ اِنت۔ آئی ءَ ترکمانستان ءِ صدر سردار بردیمحمدوف ءُ   ترکمانستان ءِ راجی سروک ءُ   ترکمانستان ءِ السی کونسل ءِ چیئرمین قربان قلی بردیمحمدوف ءِ نیمگ ءَ چہ صدر آصف علی زرداری ءَ را ھاسیں مبارکی ھم پیش کت۔ مملکت ءِ صدر ءَ شنگھائی کمکی گل ءِ حکومت ءِ سروک آنی کونسل ءِ 23می دیوان ءَ اسلام آباد ءَ بھر زوری ءِ سر ءَ کابینہ ءِ نائب چیئرمین راشد میریدوف ءِ منت گپت۔ صدر ءِ مملکت ءَ اشکباد ءِ تر ءُ   تاب ءِ وھد ءَ ترکمانستان ءِ حکومت ءِ شگر ءُ   منت گپت۔