شنگھائی کمکار تنظیم نا سروک حکومت نا کونسل نا 23 می دیوان ایسر، کماشی روس انا حوالہ

اسلام آباد۔ 16 اکتوبر (اے پی پی) شنگھائی کمکار تنظیم (ایس سی او) نا سروک حکومت نا کونسل نا 23 می دیوان باسک ملک آتا نیام اٹ گیشتر شریداری اٹ کاریم نا عزم اتون چارشنبے نادے آ داڑے ایسر مس۔ داوخت آ وزیراعظم شہباز شریف روس انا وزیراعظم میخائل مشوستن ءِ کونسل نا چیئرمین شپ ءِ سنبھالنگ آ مبارکبادی ترسا پاکستان نا کنڈآن اودے پورو کمکاری نا باوری کرفے۔ اوپارےکہ ایس سی او سروک کونسل نا بروک آ دیوان 2025اٹی روس اٹی اڈہلیک۔ وزیراعظم ایس سی او سروک کونسل نادیوان نا کماشی ءِ کرسا تینا ایسری ہیت آتیٹی وزیراعظم پارےکہ دیوان اٹی باسک ملک آک تینا بروک آ چین تا گچین و پائیدار آخبت کن اسیجائی عزم ءِ تالان کریر۔ وزیراعظم پارے کہ ایس سی او ناہدف ومسخت آتا دوئی کننگ کن پاکستان نا کنڈآن پورو مخ تفی نا عزم انا درشانی ءِ کینہ۔ اوپارےکہ ننے تینا تین پہ تینی تعلقداری تے سیاسی اختلاف آتے ایڑترتخسا اسیجائی چیلنج آتے ایسر کننگ و اسہ ایلو تون دوتے اٹ دوتے ترسا تینا الس نا تین پہ تینی فائدہ، شونداری و سوگوی کن کڑد ادا کروئی مریک۔ داوخت آ وزیراعظم محمد شہباز شریف پارے کہ غزہ ٹی ساڑی آ برجانسل کشی ءِ گوجالنگ مفک، جہانی برادری ءِ بربریت ءِ توننگ کن گام گیج کروئی مریک۔ غزہ ٹی جارحیت اسہ المیہ سے۔ ہموڑے دمدستی و غیرمشروط جنگ بندی نا گرج ءِ۔ وزیراعظم پارے کہ دے ٹک نیامی ٹی پائیدار امن کن آزاد فلسطینی ریاست نا قیام المی ءِ ہرانا سیمک 1967 آن مست انا بنداو آمریر و ہرانا دارالحکومت القدس الشریف مرے۔ تنظیم نا باسک ملک آتا سروک حکومت آک دیوان نا اسیجائی اعلامیہ نا دستاویزآتیا دستخط کریر ہراٹی اسیجائی اعلامیہ و اقتصادی و واپاری کمکاری ءِ مون آدننگ نا فیصلہ غاتون اوار اوار ایس سی او نا آخبتی ادارہ غاتا مستعدی اٹ کاریم ءِ پک کننگ نا بارواٹی فیصلہ غاک اوار ئسر۔ دادوداٹی شنگھائی کمکار تنظیم نا باسک ملک آتا راہشون ہرافتے ٹی چین نا اسٹیٹ کونسل نا وزیراعظم لی چیانگ، بیلاروس نا وزیراعظم رومن گولووچینکو، قازقستا  ن نا وزیراعظم اولز ہاس بیکو تینوو، روس انا وزیراعظم میخائل مشوستن ، تاجک وزیراعظم کوہررسول زادہ، ازبک وزیراعظم وزیر عبداللہ اریپوف، کرغزستا ن نا وزراء کابینہ نا چیئرمین اکیل بیک جاپاروف، ایران ناوزیر واپار سید محمد اتابیک و بھارتی وزیرخارجہ سبرامنیم جے شنکر ئسک بشخ ہلکر۔ داکان بیدس منگولیا اسہ مبصر ریاست اسے نا وڑاٹ سروکی دیوان اٹی بشخ ہلک ہرانا نمائندگی ءِ وزیراعظم اویون اردین لویسنا مسراینے کرے و ترکمانستان نا وزراء نا کابینہ نا نائب چیئرمین راشد میریدوف بشخ ہلکر۔ دیوان اٹی بشخ ہلوک آ ایلو شرفمند آتیٹی ایس سی او بزنس کونسل نا چیئرمین عاطف اکرام شیخ و کونسل آف ایس سی او انٹربینک یونین نا چیئرمین مارات ییلی بائیف ئسک اوار ئسر۔ وزیراعظم شنگھائی کمکار تنظیم نا دیوان نا سرسہب اڈتننگ آ غٹ قومی کوآرڈی نیٹر ، چاہندار و ایس سی او سیکرٹریٹ نا عملہ تون اوار منتظمین آتا منت واری ءِ ہرفے و اوفتے مبارکبادی تس ہرافک دستاویز و ایلو بست وبند آتے گڈیکو دروشم اس تننگ اٹ جانفشانی اٹ کاریم کریر۔