جہانی برادری غزہ ٹی دمدستی و غیر مشروط جنگ بندی نا تینا زمواری ءِ پورو کے، وزیراعظم محمد شہبا زشریف

اسلام آباد۔ 16 اکتوبر (اے پی پی) وزیراعظم محمد شہبا زشریف جہانی برادری آ زور شاغانے کہ اوغزہ ٹی دمدستی و غیرمشروط جنگ بندی نا تینا زمواری ءِ پورو کے، دے ٹک نیامی  ٹی پائیدار امن کن آزاد فلسطینی ریاست نا جوڑ کننگ المی ءِ، پاکستان ڈیہہ انا شونداری کن تیناپبی کڑد ءِ ادا کرساکیک۔ چارشنبے نادے آ شنگھائی کمکار تنظیم نا سروک حکومت نا کونسل نا 23 می دیوان نا ایسری نشست اٹی تران کرسا وزیراعظم ایس سی او راہشون تے پارساپارےکہ داوخت آ نن غزہ ٹی ساڑی آ برجانسل کشی ءِ گوجالنگ کپنہ۔ جہانی برادری ءِ بربریت ءِ توننگ کن گام گیج کروئی مریک۔ غزہ ٹی جارحیت اسہ المیہ سے۔ ہموڑے دمدستی و غیرمشروط  جنگ بندی نا گرج ءِ۔ وزیراعظم پارے کہ دے ٹک نیامی ٹی پائیدار امن کن آزاد فلسطینی ریاست نا جوڑ کننگ المی ءِ، ہرانا سیمک 1967آن مست انا بنداو آمریر و ہرانا دارالحکومت القدس الشریف مرے۔ وزیراعظم پارے کہ کونسل نا 23 می دیوان سرسہبی اٹ ایسر مسنے، ہراٹی باسک ملک آک تینا بروک  آ چین تا گچین و پائیدار آخبت کن اسیجائی عزم ءِ تالان کریر۔ وزیراعظم پارےکہ ایس سی او نا ہدف و مسخت آتا دوئی کننگ کن پاکستان نا کنڈآن پورو مخ تفی نا عزم انا درشانی ءِ کینہ۔ اوپارے کہ ننے تینا تین پہ تینی تعلقداری تے سیاسی اختلاف و تقسیم آن ایڑتر تخسا اسیجائی چیلنج آتے ایسر کننگ و اسہ ایلو نا دوتے اٹ دوتے ترسا تینا الس نا تین پہ تینی فائدہ ، شونداری و سوگوی کن کڑد اداکروئی مریک۔ داوخت آ وزیراعظم روس انا وزیراعظم میخائل مشوستن ءِ کونسل نا چیئرمین شپ ءِ سنبھالنگ آ مبارکبادی ترسا پارےکہ پاکستان نا کنڈآن اودے پورو کمکاری نا باوری کرفنہ ۔ وزیراعظم شنگھائی کمکار تنظیم نا دیوان نا سرسہب اڈتننگ آ منتظمین آتے مبارکبادی تس۔