شنگھائی کمکار تنظیم نا طاقت اونا سیاسی و اقتصادی جہت و پبی دودوربیدہ ئی گیشتری ٹی ءِ، اقتصادی وڑاٹ مربوط ڈیہہ انا اسیجائی وژن ءِ مون آدننگ نا گرج ءِ، وزیراعظم شہباز شریف

اسلام آباد۔ 16 اکتوبر (اے پی پی) وزیراعظم محمد شہباز شریف پارینے کہ شنگھائی کمکار تنظیم (ایس سی او) نا طاقت اونا سیاسی و اقتصادی جہت و پبی دودوبیدہ ئی گیشتری ٹی ءِ، ڈیہہ اٹی تین پہ تینی رابطہ غاتا ڈٹ آتے زرکاری نا رداٹ ہُننگ نا گرج ءِ ہرا اقتصادی وڑاٹ مربوط ڈیہہ انا اسیجائی وژن ءِ مون آدننگ کن اہم ءِ، مربوط و شونہال ڈیہہ اکن اواری اٹ کاریم کننگ آن غٹ باسک ملک آتے فائدہ مریک، پاکستان باسک ملک آتا نیام اٹ السی دودوربیدہ ئی رابطہ غاتا تبادلہ غاتے مون آ دننگ نا پبی مخ تف ءِ، یکجا مرسا نن راجی واقتصادی شونداری، علاقائی امن و سوگوی و تیناشاری تا زند انا آب ءِ گچین کننگ کینہ، بے گمانی موسمیاتی بدلی انسانیت نا وجود کن غٹ آن بھلا خطرہ ءِ،ایس سی او ملک آتا نیام اٹ معاہدہ و ایم اویوتے عملی دروشم اس تننگ نا وخت بسنے۔ چارشنبے نادے آ شنگھائی کمکار تنظیم نا سروک حکومت نا کونسل نا 23 می دیوان اٹی تینا تران اٹی وزیراعظم پارے کہ نن تینا شرفمند آ مہمان تے پاکستان نا زیبا انگا دارالحکومت اسلام آباد اٹی بخیراٹ پانہ، ایس سی او نا سروک حکومت نا داشاندار مچی نا مہمانداری ننکن شرفمندی نا ہیت اسے ہرادنیا نا 40 درسد آبادی نا نمائندگی ءِ کننگ ءِ، ایس سی او شنگھائی سپرٹ نا رداٹ پائیدار شونداری، شونہالی، اجتماعی سلامتی و تین پہ تینی فائدہ غاتیا تالان کمکاری نا اسیجائی عزم انا عکاسی ءِ کننگ ءِ۔ اینونادیوان ننامتنوع قوم تا نیام اٹ تعلقداری و کمکاری نا واکداری نا ڈیک ءِ، یکجامرسا نن راجی و اقتصادی شونداری، علاقائی امن وسوگوی و تینا شاری تا زند اناآب ءِ گچین کننگ کینہ۔ دااہم موقعءِ خیال آتا درشانی، تینا گچین آزموندہ غاتا ہل و تس، و جوان عملی ڈٹ آتے عملی دروشم اس تننگ کن کاریم اٹ اتنگ نا گرج ءِ، ہراڑآن ننا زرگزران و راج آتے فائدہ رسینگک۔ کنے اومیت ءِ کہ دیوان اٹی سیرحاصل گپ وتران نا نتیجہ ایس سی او ڈیہہ انا الس کن مفید و دوررس مریک۔ وزیراعظم پارے کہ نن تاریخی بدلی تتون مون تننگ اُن ہراڑے ترند تر بدلی راجی، سیاسی، زرگزرانی وسلامتی نا منظرنامہ ءِ بدل کننگ ءِ۔ کنے پورو یقین ءِ کہ نن اجتماعی دانش اٹ غٹ باسک ملک آتا الس ءِ زیات شونہال، سوگو ورکھ آخبت تننگ نا کچ تخک۔ وزیراعظم پارے کہ تدوک  آسال ہراتم پاکستان داباوقار فورم نا کماشی ءِ سنبھالا، تونن علاقائی امن و سوگوی، تین پہ تینی رابطہ و پائیدار شونداری نا بشخ آتیٹی تینا اولیت آتا درشانی ءِ کرین و راجی و دودوربیدہ ئی گام گیج آتے مون آدرین، ہرا ننا خیال اٹی تنظیم نا آخبت و ننا اجتماعی شونداری کن اہمیت تخک، تینا ایلم باسک ملک آتا کمک اٹ نن داکسر آ مون آہِننگ اٹ سرسہب مسونن ہرانا جھلک دیوان نا اسیجائی اعلامیہ ٹی نظربریک ہرا تعلقدار مالی کمکاری ناوڑوڈول، چاگڑد دوست شونداری، چاگڑدی رکھ انا بشخ آتیٹی ہم گرنچی، تعلیمی و سیل وسواتی رابطہ غاتا کمک اٹ راجی و دودوربیدہ ئی رابطہ غاتے ودفنگ تون اوار اوار نیزگاری تون مون تننگ و ننا زالبول و ورناتے واکدار کننگ کن گچین وڑوڈول آتا شریداری نا کمک اٹ پائیدار و جوان اقتصادی شونداری ءِ سوگو کننگ نا ننا اسیجائی وژن ناعکاسی ءِ کننگ ءِ۔ وزیراعظم پارے کہ پاکستان نا کماشی ٹی کیہی مثبت و آخبت نا بابت گام گیج کننگا، اوٹی ایس سی او نا بنداوی اقتصادی اولیتی بنداو نا جوڑ کننگ نا تصور، تنظیم نا باسک ملک آتا نیام اٹ واپار نا مون آ دننگ کن تنظیم تا نیام اٹ کمکاری، تخلیقی زرگزران نا شونداری نا پڑاٹ باسک ملک آتا نیام اٹ کمکاری نا فریم ورک و ایس سی او نیواکنامک ڈائیلاگ پروگرام کون آ گام گیج آک اوار ءُ۔ وزیراعظم اجتماعی وڑاٹ داتصور آتا عملی نفاذ کن لائحہ عمل نا سلاہ ترسا پارے کہ دانا کمک اٹ اقتصادی و واپاری بشخ آتیٹی باسک ملک آتا نیام اٹ ساڑی کمکاری ءِ سوگو و گہرا کننگ مریک۔ وزیراعظم پارے کہ شنگھائی کمکار تنظیم نا بابت اوغانستان اہم ءُ ملک اسے، راجی و اقتصادی وڑاٹ سوگو اوغانستان غٹ باسک ملک آتے گچین رابطہ غاتیکن عمل نا قابل و اقتصادی وڑاٹ فائدہ مند واپاری و ٹرانزٹ راہداری پیش کننگ کیک، دامسخت نا دوئی کننگ کن سوگو اوغانستان بھاز المی ءِ ، جہانی برادری ءِ ہراڑے انسانی تنکی و زرگزرانی بدحالی ءِ توننگ کن اوغانستان نا عبوری حکومت نا کمک کن درکار کمک فراوان کننگے، ہموڑے اودے اوغان عبوری حکومت آن سیاسی شمولیت ءِ مون آ دننگ کن پبی گام گیج کننگ تون اوار اوار داہیت ءِ پک کننگ ناہم خواست کننگے کہ اوغانستان نا گل زمین ادارہ یا تنظیم اسے نا کمک اٹ اونا ہمسایہ غاتا برخلاف دہشت گردی کن کاریم اٹ بایدے اتنگپ۔ وزیراعظم پارے کہ اقتصادی کمکاری ایس سی او نا اہم ٹک ءِ، ٹرانسپورٹ و توانائی نا راہداری کون آ علاقائی بنداوی پنجر نا ڈٹ آتیٹی زرکاری اقتصادی انضمام کن بھاز المی ءِ۔ پاکستان دا رداٹ 2030 اسکان توانائی نا بشخ اٹی کمکاری نا مون آدننگ کن حکمت عملی نا بابت شنگھائی کمکار تنظیم نا سروک مملکت نا کونسل نا فیصلہ غاتون اوار اوار زرکارآتا ایسوسی ایشن نا جوڑ کننگ نا ستاءِ کیک۔ وزیراعظم شنگھائی کمکار تنظیم نا ملک آتا کنڈآن رابطہ غاتا غٹ گام گیج آتا خیرمقدم ءِ کرساپارےکہ ، پاکستان اسہ سوگو ایس سی او کنیکٹیویٹی فریم ورک اسے نا جوڑ کننگ نا پرزور مخ تفی ءِ کیک ہراڑآن نئے بیرہ علاقائی واپار کن گیٹ وے فراوان مریک بلکن یورو ایشیائی رابطہ و واپار نا وژن ءِ ہم مون آ کہول اسکان دننگ مریک، بیلٹ اینڈ روڈ انیشی ایٹیو، چین پاکستان اقتصادی راہداری و انٹرنیشنل نارتھ ساؤتھ کوریڈور کون آ ڈٹ آتے سڑک، ریلوائی و ڈیجیٹل انفراسٹرکچر آ چکار کرسا رابطہ غاتیٹی گچینی کن کاریم اٹ اتنگ مریک۔ وزیراعظم پارےکہ داوڑنا ڈٹ آتے سیاسی رداٹ آخا بلکن تینا اجتماعی رابطہ غاتا لائخی تیٹی زرکاری نا رداٹ ہُننگ نا گرج ءِ ہرا اقتصادی وڑاٹ مربوط ڈیہہ انا اسیجائی وژن ءِ مون آ دننگ کن اہم ءِ، مربوط و شونہال ڈیہہ اکن اواری اٹ کاریم کننگ آن غٹ باسک ملک آتے فائدہ مریک۔ وزیراعظم پارے کہ نیزگا ری نا مقابلہ ءِ کننگ نئے بیرہ اخلاقی گرج بلکن زرگزرانی شونداری و شونہالی نا اسہ بنداوی محرک اسے۔ شنگھائی کمکار تنظیم نا سیم تا تہہ ٹی کرہ ارض آ نیزگار آبادی نا غٹ آن بھلا کچ اناساڑی گری ننے نیزگاری نا چٹفنگ کن خڑکی کمکاری کننگ آ بیوس کیک، ایس سی او نا خصوصی ورکنگ گروپ نا آخبتی چیئر نا وڑاٹ نیزگاری تون مون تننگ کن پاکستان چندی اسیجائی سیمینار ، ویبناراڈتس، ہرانا مسخت علم و گچین وڑوڈول آتا کمک اٹ نیزگاری تون مون تننگ کن گام گیج آتے پک کننگ ءِ، نن نیزگاری نا بنداوی سوب آتے ایسر کننگ کن تینا اجتماعی کوشست آتیٹی تیناکڑد ءِ برجاتخنہ و باسک ملک آتے تینا پورو اقتصادی لائخی تیان فائدہ ہرفنگ، پائیدار شونداری و تینا شاری تا جم زند انا آب ءِ گچین کننگ نا قابل کینہ۔ موسمیاتی بدلی و اوڑآن مروک آ نسخان تا ذکرءِ کرسا وزیراعظم پارے کہ بے گمانی موسمیاتی بدلی انسانیت نا وجود کن غٹ آن بھلا خطرہ ءِ انتئے کہ اونا بھسکاری  بھاز زیات ءِ و سیم تیان ماوراء ءِ، موسمیاتی بدلی تا مقابلہ ءِ کننگ و ایس سی او نا ڈیہہ انا تہہ ٹی چاگڑد نا رکھ، پائیدار شونداری، اقتصادی سوگوی و راجی آسودہی ءِ پک کننگ کن اسیجائی گام گیج المی ءِ۔ اوپارےکہ پاکستان موسمیاتی خطرہ غاتاگواچی ملک آتیٹی سرفہرست ءِ، پاکستان باسک ملک آتا نیام اٹ چاگڑدی کمکاری ءِ مون آ دننگ و موسمیاتی موزونیت نا مخ تفءِ، تانکہ ننا ساڑی آ و بروک آ چین تیکن رکھ آخبت ءِ پک کننگ مرے، وزیراعظم پارے کہ پاکستان نا کماشی ٹی کیہی مثبت و آخبت نا بابت گام گیج کننگا، اوٹی ایس سی او نا بنداوی اقتصادی اولیتی بنداو نا جوڑ کننگ نا تصور، تنظیم نا باسک ملک آتا نیام اٹ واپار نا مون آ دننگ کن تنظیم تا نیام اٹ کمکاری، تخلیقی زرگزران نا شونداری نا پڑاٹ باسک ملک آتا نیام اٹ کمکاری نا فریم ورک و ایس سی او نیواکنامک ڈائیلاگ پروگرام کون آ گام گیج آک اوار ءُ۔ وزیراعظم اجتماعی وڑاٹ داتصور آتا عملی نفاذ کن لائحہ عمل نا سلاہ ترسا پارے کہ دانا کمک اٹ اقتصادی و واپاری بشخ آتیٹی باسک ملک آتا نیام اٹ ساڑی کمکاری ءِ سوگو و گہرا کننگ مریک۔ وزیراعظم پارے کہ شنگھائی کمکار تنظیم نا بابت اوغانستان اہم ءُ ملک اسے، راجی و اقتصادی وڑاٹ سوگو اوغانستان غٹ باسک ملک آتے گچین رابطہ غاتیکن عمل نا قابل و اقتصادی وڑاٹ فائدہ مند واپاری و ٹرانزٹ راہداری پیش کننگ کیک، دامسخت نا دوئی کننگ کن سوگو اوغانستان بھاز المی ءِ ، جہانی برادری ءِ ہراڑے انسانی تنکی و زرگزرانی بدحالی ءِ توننگ کن اوغانستان نا عبوری حکومت نا کمک کن درکار کمک فراوان کننگے۔ وزیراعظم پارے کہ ایس سی او سروک حکومت نا وڑاٹ ننے تینا نجی بشخ آتا است بڈی ءِ کننگ نا گرج ءِ تانکہ ایس سی او ڈیہہ اٹی کاروبار و زرکاری نا مون آدننگ کن سازگار چاگڑد اس ودی کننگ مرے۔ پاکستان نا فیڈریشن آف چیمبرز آف کامرس اینڈ انڈسٹری ایس سی او بزنس کونسل نا کمک اٹ 12 ستمبر 2024 آ اسلام آباد اٹی ایس سی او نا وزراء خارجہ واپار نا دیوان نا وخت آ اسہ بھاز فائدہ ئی کانفرنس اس اڈتس۔ پاکستان کاروباری برادری نا نیام اٹ رابطہ غاتیٹی ودکی کن باقاعدگی اٹ داوڑنا دود اڈتننگ کن ایس سی او بزنس کونسل نا است بڈی ءِ کیک۔ اوپارےکہ تنظیم نا باسک ملک آتا نیام اٹ تین پہ تینی وڑاٹ قابل قبول کرنسی تیٹی تصفیہ نا گرج انا بارواٹی اسہ پیدوار اتفاق اس ساڑی ءِ، تنظیم نا گڑاس باسک ملک آتیا اسہ کنڈی پابندی تا رداٹ ایس سی او نا انٹربینک یونین، بینکنگ نا ویل آتیا گپ وتران و ویل آتا ایسری کن اہم فورم ءِ ہرا کثیر الجہتی اثر آتیا تالان گام گیج آتا کمک اٹ ڈیہہ اٹی واپار ءِ ودفنگ کیک۔ وزیراعظم شنگھائی کمکار تنظیم نا کنڈآن  گیگ بدل شونداری فنڈنگ میکانزم جوڑ کننگ نا سلاہ نا مخ تفی ءِ کرسا پارےکہ داڑآن تعطل نا شکار چندی شونداری گام گیج آتے مون آ دننگ اٹ کمک رسینگک۔ نن ایس سی او نا پروجیکٹ سرجز آتیکن مالی کمکاری نا وڑوڈول آتا بارواٹی ایس سی او کونسل آف ہیڈز آف اسٹیٹ نا وخت آ فیصلہ ناہم ستاءِ کینہ۔ وزیراعظم پارے کہ شنگھائی کمکار تنظیم نا طاقت اونا سیاسی و اقتصادی جہت وپبی دودوربیدہ ئی نا تنوع ٹی ءِ۔ پاکستان باسک ملک آتا نیام اٹ السی و دودوربیدہ ئی رابطہ غاتا ہل وتس ءِ مون آدننگ ءِ اہمیت ایتک۔ تین پہ تینی افہام و تفہیم و شرف ءِ مون آدرسا نن داوڑنا دیرپاکمکاری نا بنداو ءِ تخنگ کینہ ہرا سیم تیا ن ایڑترمرے و ہراڑآن ننا راج آتے سوگوی ملک۔