وزیراعظم محمد شہباز شریف نا کماشی ٹی شنگھائی کمکار تنظیم نا کونسل آف ہیڈز آف گورنمنٹ نا 23 می دیوان بناکرے

اسلام آباد۔ 16 اکتوبر (اے پی پی) شنگھائی کمکار تنظیم (ایس سی او) نا باسک ملک آتا کونسل آف ہیڈز آف گورنمنٹ (سی ایچ جی) نا 23 می دیوان وزیراعظم محمد شہباز شریف نا کماشی ٹی چارشنبے نادے آ داڑے جناح  کنونشن سینٹر اٹی بناکرے، وزیراعظم ایس سی او دیوان اٹی بشخ ہلوک آ حکومت نا سروک آتا بننگ آ جم وجوش اٹ بخیرکرے۔ دیوا ن اٹی شریک باسک ملک آتا گیشتر حکومت ناسروک و وزیر آک تدوک آدے بنجائی دارالحکومت اسلام آباد آ سرمسوسر وخت اس کہ چین نا وزیراعظم لی چیانگ مہالو آن ہی سرکاری دورہ غا پاکستان اٹی ءِ۔ شنگھائی کمکار تنظیم نا دیوان اٹی بشخ ہلنگ کن روس انا وزیراعظم میخائل مشوستن و ایرانی وزیر معدنیات محمد اتابک ہم پاکستان آ سرمسنو۔ دیوان اٹی شنگھائی کمکار تنظیم نا راہشون ایس سی او نا باسک ملک آتا نیام اٹ زرگزران، واپار، چاگڑد و راجی دودوربیدہ ئی رابطہ غاتا بشخ آتیٹی برجاکمکاری آ گپ وتران کیرہ و تین پہ تینی تعلقداری ءِ مون آ دننگ تون اوار اوار ایلو امور تیا سجفرہ۔ کونسل آف ہیڈز آف گورنمنٹ (سی ایچ جی) شنگھائی کمکار تنظیم نا ارٹ میکو بڑزکو انگا فورم ہرانا کماشی پاکستان تونءِ، و وزیراعظم محمد شہباز شریف داوخت آ کونسل نا چیئرنا عہدہ غاٹی ءِ۔ شنگھائی کمکار تنظیم نا اِرادے ئی سروک دیوان اٹی چین، روس، کرغزستان ، بیلاروس، تاجکستان، ترکمانستان،قازقستان ،منگولیا، بھارت ، ایران و ایلو ملک آتا راہشون تیان بیدس مبصر ملک و ڈائیلاگ پارٹنربشخ ہلنگ اٹی ءُ۔ وزیراعظم محمد شہباز شریف شنگھائی کمکار تنظیم (ایس سی او) نا باسک ملک آتا کونسل آف ہیڈز آف گورنمنٹ نا جناح کنونشن سینٹر اسلام آباد اٹی مروک آ باضابطہ دیوان آن مست باسک ملک آتا راہشون آتے بخیرکرے۔ داہیت ذکر انا قابل ءِ کہ پاکستان کرغزستان نا دارالحکومت بشکیک اٹی اکتوبر 2023اٹی مروک آ دیوان اٹی سال 2023-24کن سروک حکومت نا کونسل نا چیئرءِ سنبھالاسس۔ وزیراعظم محمد شہباز شریف تدوک آ نن شنگھائی کمکار تنظیم نا باسک ملک آتا ڈل آتا اعزاز اٹی سُوارہ اس تس، ہراٹی چین، روس، تاجکستان، کرغزستان، قازقستان ، بیلاروس و ترکمانستان تون اوار باسک ملک آتا راہشون و مندوبین آک بشخ ہلکر۔ داوخت آ وزیراعظم محمد شہباز شریف و نائب وزیراعظم و وزیرخارجہ سینیٹر محمد اسحاق ڈار مہمان تے بخیراٹ پاریر و دیوان اٹی بشخ ہلنگ آ اوفتے بخیراٹ پاریر۔ مہماندار وزیراعظم شریک راہشون آتون عکس  ہم کشا۔ دیوان اٹی منگولیا بطور مبصر ایس سی او سروکی دیوان اٹی بشخ ہلنگ اٹی ءِ۔ ایس سی او نا سیکرٹری جنرل جانگ منگ و ایلو اہم شخصیت آک ہم ایس سی او ٹی بشخ ہلنگ اٹی ءُ۔ شنگھائی کمکار تنظیم نا باسک ملک آتا کونسل آف ہیڈز آف گورنمنٹ نا دیوان آن وزیراعظم محمد شہباز شریف نا بنائی تران آن پد درملکی ڈل آتا سروک آک تران کیرہ ۔