پشاور۔ 19 اگست (اے پی پی) گورنر خیبرپختونخوا فیصل کریم کنڈی پارینے کہ قبائلی الس نا ملک و قوم اکن بھلو خذمت اسے، قبائلی الس نا محرومی تے چٹفنہ، فاٹا انضمام آن پد بھاز انگا سنجیدگی و ویل آتون مون تروئی تمنگ ءِ، گچین مروک آ السی نمائندہ غاتے خاص وڑاٹ قبائلی الس مون ترو ک ویل آتے ایسر کننگ کن کڑد ادا کیر۔ داخیال آتا درشانی ءِ او دوشنبے نادے آ گورنر ہاؤس پشاور اٹی ضم ضلع خیبرکوکی خیل قبیلہ نا اسہ نمائندہ ڈل اسے تون اوڑدہی ٹی کرے۔ ڈل اٹی پاکستان پیپلزپارٹی PK-70نا اومیتدار ملک واحد شاہ، ملک ناھید شاہ ، خان محمد، ثناء اللہ تون اوار ایلو مشران آک اوار ئسر۔ ڈل اٹی بشخ ہلوک آک گورنر ءِ کوکی خیل قبیلہ نا زہمی تے مون ترو ک ویل ومشکل آتیان معلومدار کرے۔ اوپارے کہ او 2012آن آئی ڈی پیز نا زند ءِ تیر کننگ ءُ، 2017 آن داتم اسکان کم و ود 60 درسد علاقہ کلیئر مسنو، ولے اوداسکان ٹی ڈی پیز نا زند ءِ تیر کننگ آ بیوس ءُ۔ اوپارے کہ پورو بھس مروک اُراتا معاوضہ ہم طے مسوسس ولے اوڑآ ہم داسکان عملدرآمد متنے۔ ڈل بنجانا نمائندہ نا حیثیت اٹ اوفتا ویل آتے بنجائی حکومت نامون آ تخنگ و اوفتے مون ترو کویل آتا ایسری کن گورنر تون کمکاری نا درخواست کرے ۔ گورنر پارے کہ گورنر نا عہدہ ءِ سنبھالنگ تون اوصوبہ و ضم ضلع غاتا الس ءِ مون ترو ک ویل آتا ایسری کن بنجائی حکومت تون ہیت کرے و آخبت ہم تعلقدار فورم آ ویل آتا ایسری کن توار بڑزکرسا کیوہ۔ اوڈل ءِ باور کرفے کہ کوکی خیل قبیلہ نا ویل آتا ایسری کن صدر، وزیراعظم تون اوار ہرفورم آ کڑد اداکیوہ، کمشنر پشاور ڈویژن آن معلومداری دوئی کرسا اخس زوت مننگ کرے کوکی خیل قبیلہ نا ویل آتے ایسر کننگک۔ ڈل اٹی بشخ ہلوک آک ویل آتا ایسری ٹی است خواہی ہلنگ آ گورنر نا منت واری ءِ ہرفیر۔
