اسلام آباد۔ 19 اگست (اے پی پی) بنجائی وزیر ڈٹ بندی احسن اقبال پارینےکہ چاگڑدی بدلی کشت وکشار نا روایتی وڑوڈول آتیا اثرشاغانے، 2022 نا نوکاپ آن 30 ارب ڈالر نا نسخان مس، پاکستان کشاری اجناس نا پیدوار اٹی اولیکو دہ ملک آتیٹی بریک ولے پیدواریت ناکچ اٹی کم انگا ءِ۔ داخیال آتا درشانی ءِ او دوشنبے نادے آ نیشنل اسکول آف پبلک پالیسی لاہور اٹی فوڈ سیکورٹی کانفرنس آن تران کرسا کرے۔ اوپارے کہ فوڈ سیکورٹی قومی سیکورٹی و شونداری نا اہم تمبہ ءِ، چاگڑدی بدلی کشت وکشار نا روایتی وڑوڈول آتیا اثرشاغانے، ننا آبادی ٹی ترندی اٹ ودکی مننگ ءِ۔ احسن اقبال پارے کہ 2017 اسکان آبادی ٹی ودکی ناکچ کم مسکہ، داسہ ودنگ بناکرینے، ملک ءِ دیر انا کمتی نا ہم خطرہ ءِ ہرا آخبت اٹ فوڈ سیکورٹی کن خطرہ اس جوڑ مننگ کیک۔ بنجائی وزیر پارے کہ 2022 نا نوکاپ آن 30 ارب ڈالر نا نسخان مس، داوخت آ ملک 2018 نا بدلی نا ودی کروک زرگزرانی تنکی تون مون تننگ ءِ، کل بجٹ نا 50 درسد وام تا ادائیگی ٹی کاہک۔ اوپارے کہ پاکستان کشاری اجناس نا پیدوار اٹی اولیکو دہ ملک آتیٹی بریک ولے پیدواریت ناکچ اٹی کم انگا ءِ، پوسکن آ بج، ٹیکنالوجی و پوسکن آ کشت وکشار نا وڑوڈول آتے تینا کننگ ءِ، ننا ملک غٹ نعمت آتیان شپ ءِ، ننے پاکستان ءِ دُوارہ شونداری نا رُمب اٹ سرسہب کروئی ءِ۔ احسن اقبال پارے کہ ہراوڑ ارشد ندیم گولڈ میڈل ءِ ہلک او مچ آ قوم اکن کسر نا ڈیوا ءِ۔ اوپارے کہ ملک شونداری کن امن تون پالیسی تیٹی سوگوی و تسلسل المی ءِ۔ پاکستان نیوکلیئر پروگرام اٹی معجزہ کرسا نشان تسوسس تو زرگزرانی پڑ اٹی ہم کننگ کیک۔ ایٹمی پروگرام اٹی سرسہبی، مشن نا یکسوئی، سرکڑدہ غاتا سوگوی، میرٹ، و انسانی وسیلہ غاتا شونداری آن دوئی مس، داوخت آ نن ہراہندآٹی اُن ننے سنجیدگی اٹ سجفوئی مریک کہ مون آ امر ہنوئی ءِ۔ اوپارے کہ نن مستین اٹ وژن 2010، وژن 2025کون آ شاندار پلان جوڑ کے ولے او سیاسی نزوری نا گواچی مس، 5 ایز فریم ورک نار داٹ 2024-29نا پنچ سال انا شونداری ڈٹ ءِ گڈیکو دروشم اس تننگ اُن، داسہ ردینک، بے چیٹی و پھسات نا گنجائشت اف۔ اوپارے کہ ننتون غٹ علم و علاج ارے ولے او رپورٹ آتسکان محدود ءُ، داسہ عملدرآمد نا کمک اٹ علم و عمل نا نسخان ءِ پورو کروئی ءِ۔ احسن اقبال پارے کہ اسہ ہزار کشاری چاہندار آتے وزیراعظم نا پارت آ کشت وکشار نا پوسکن آ وڑوڈول آتے ٹی عملی تربیت کن چین آ گدریفنگ انگ ءِ۔
