اسلام آباد۔ 17 اگست (اے پی پی) وزیراعظم محمد شہباز شریف پارینے کہ جہانی ادارہ جان جوڑی نا کنڈآن منکی پاکس ءِ پبلک ہیلتھ ایمرجنسی اس گوندنگا اوکان پد پاکستان اٹی ہم دا ناجوڑی نا بابت سخت چاروکی نا گرج ءِ۔ وزیراعظم آفس میڈیا ونگ انا کنڈآن جاری اعلامیہ نا رداٹ وزیراعظم محمد شہباز شریف نا کماشی ٹی منکی پاکس (Monkey Pox)نا بابت اہم ءُ دیوان اس مس ہراٹی او ملک انا بالی پٹ، بندرگاہ و بارڈر آتیا منکی پاکس نا اسکریننگ نا نظام ءِ گچین کننگ ، بارڈر ہیلتھ سروسز ءِ حالیت آتا پبی چاروکی و سخت سرویلنس ، نیشنل کمانڈ اینڈ آپریشنز سینٹر ءِ منکی پاکس نا حالیت آتیا سخت نظر تخنگ و دا بابت ہڑدےئی جاچ ہلنگ، منکی پاکس نا جاچ انا بابت غٹ المی ازباب و کٹ آتا فراوانی ءِ پک کننگ، منکی پاکس نا تالانی ءِ توننگ نا بابت صوبائی حکومت، حکومت گلگت بلتستان و حکومت آزاد جموں وکشمیر تون رابطہ غاتے گچین کننگ و منکی پاکس نا بابت گچین و جوان آگاہی مہم نا بناءِ کننگ نا پارت کرے۔ وزیراعظم پارے کہ او منکی پاکس نا بابت ہفتہ وار حوال ہلسا کیک۔ حوال اٹی دیوان ءِ پاننگا کہ زوت آتے اٹ ضلع مردان نا اسہ بندغ اسے ٹی منکی پاکس دین پک مسنے، زہمی بندغ روزگار نا چرجوئی ٹی پیشن نا ملک اٹی ئس و زوت آتے اٹ پاکستان آ بس، زہمی بندغ ءِ قرنطینہ ٹی تخنگانے ، زہمی بندغ نا حالیت خطرہ غان پیشن ءِ۔ دیوان ءِ مستی پاننگاکہ پاکستان اٹ داوخت آ منکی پاکس نا لوکل ٹرانسمیشن اف۔ جہانی ادارہ جان جوڑی نا کنڈآن 14 اگست 2024 آ منکی پاکس ءِ پبلک ہیلتھ ایمرجنسی گوندنگا اوکان پد نیشنل کمانڈ اینڈ آپریشن سینٹر (این سی او سی) نا کنڈآن منکی پاکس نا بابت نیشنل ایڈوائزری و المی پارت جاری کننگانے۔ بنجائی حکومت و صوبائی حکومت آک منکی پاکس نا بابت آگاہی مہم نا بناءِ کننگ ءُ۔ داوخت آ پاننگاکہ منکی پاکس نا بابت سول ایوی ایشن اتھارٹی پیشن نا ملک آن بروک آ جہاز آتا چاروکی ءِ کیک۔ صوبائی حکومت آک، حکومت گلگت بلتستان، حکومت آزاد جموں و کشمیر و اسلام آباد کیپٹیل ٹیریٹری انتظامیہ بھلا ہسپتال آتیٹی آئسولیشن وارڈ و کٹ منکی پاکس نا گمانی مریض آتیکن جتا کرینے، غٹ بنجائی اکائیک منکی پاکس نا بابت پیشگی گام گیج کننگ ءُ۔ دیوان اٹی وزیراعظم نا کوآرڈی نیٹر قومی جان جوڑی ڈاکٹر ملک مختار احمد بھرتھ ، بنجائی سیکرٹری قومی جان جوڑی ندیم محبوب، چیئرمین نیشنل ڈیزاسٹر مینجمنٹ اتھارٹی لیفٹیننٹ جنرل انعام حیدر ملک ، ہر چار آ صوبہ، گلگت بلتستان و آزاد جموں وکشمیر نا چیف سیکرٹریک، چیف کمشنر اسلام آباد کیپیٹل ٹیریٹری و تعلقدار بڑزکو سرکاری آفیسر آک ہم ساڑی ئسر۔
