اسلام آباد۔ 17 اگست (اے پی پی) نیشنل ڈیزاسٹر مینجمنٹ اتھارٹی (این ڈی ایم اے) پارینے کہ بروک آ 24 آن 48 گھنٹہ ٹی مچ آ ملک اٹی لوڑ و ہورہ و گروک اٹ پِر انا گمان ءِ۔ ترجمان این ڈی ایم اے نا رداٹ پنجاب اٹی لاہور، سیالکوٹ ، نارروال، شنزئی آ پِر تا سوب آن اربن فلڈنگ نا گڑتی ءِ، دریائے چناب اٹی نیامی آن بڑزکو درجہ نا نوکاپی دیر گمانی، ہندی جل تیٹی طغیانی نا سوب جوڑ مننگ کیرہ، سویلی پنجاب نا ضلع رحیم یار خان، بہاولپور و ملتان اٹی ہم پِر و اربن فلڈنگ نا گمان ءِ۔ ترجمان پارے کہ ڈی جی خان و ارجن پور اٹی ہل ٹورینٹ نا خطرہ مننگ کیک، بلوچستان نا علاقہ قلات، زیارت، ژوب، کوئٹہ ٹی شنزئی آ پِر و ہل ٹورینٹ نا گڑتی ءِ، سندھ اٹی نواب شاہ و سکھر اٹی گڑاس ہند آتیا اربن فلڈنگ مننگ کیک۔ اوپارے کہ شاریک موسم نا اپ ڈیٹ و الرٹ آتیان باخبر سلر، بشام الرٹ آتیکن این ڈی ایم اے ڈیزاسٹر الرٹس ایپ ڈاؤن لوڈ کیر، اربن فلڈنگ نا اثرآتیان بچنگ کن شیفکو علاقہ غاتیٹی ہنکینی چھت و کھڑکی تے جوان وڑاٹ واٹر پروف جوڑ کیر۔ برساتی دیر مچ مننگ آن بچنگ کن خصوصی گام گیج کننگے، گٹر و دیر کشنگ نا نظام ءِ گچین کیر، نزور انفراسٹرکچر ءِ رکھ کیر ہرا ترند تہو و ترند پِر آن نسخان نا سوب جوڑ مننگ کیک۔ نوکاپی دیر اٹی چلینگ ، تارخلنگ یا گاڈی چلیفنگ آن پاناد کیر، نوکاپی علاقہ غاتیان بچنگ کن گیگ بدل کسر تے کاریم اٹ اتیر، این ڈی ایم اے غٹ تعلقدار محکمہ غاتے چوکس سلنگ و الس کن رکھی گام گیج کننگ نا پارت جاری کرینے۔
