راولپنڈی۔ 17 اگست (اے پی پی) اینٹی نارکوٹکس فورس منشیات اسمگلنگ نا برخلاف 8 کارروائی تیٹی 7،504،000روپئی مالیت نا 78 کلوگرام منشیات دوئی کرسا 9 دوبہ دار آتے دزگیرکرے۔ اے این ایف ہیڈکوارٹر راولپنڈی آن جاری تدوک آ 24 گھنٹہ نا انسداد منشیات آپریشن تا سرجم حوال آتا رداٹ اسلام آباد بالی پٹ آ سعودیہ و بحرین آ ہنوک آ 2 مسافر آتیان 2.8 کلوگرام آئس دوئی کننگا۔ ایم ون اسلام آباد نا خڑک اِرا جتا کارروائی تیٹی 40.8 کلوگرام چرس و 2.4 کلوگرام افیم دوئی کرسا اِرا دوبہ دار آتے دزگیرکننگا۔ شاہراہ شاہ والی کراچی نا خڑک اِرا دوبہ دار آن 14.4 کلوگرام چرس دوئی کننگا۔ لاہور اٹی ساتو کاٹلہ خلق اٹی موٹرسائیکل سوار اسے آن 8.4 کلوگرام چرس دوئی کننگا۔ اسلام آباد نا سیکٹر جی 15 ٹی دوبہ دار آن 6 کلوگرام چرس و 1.2 کلوگرام افیم دوئی کننگا۔ سیالکوٹ اٹی دوبہ دار آن 2.2 کلوگرام چرس دوئی کننگا۔ ترجمان اے این ایف پارے کہ دزگیر دوبہ دار آتا برخلاف انسداد منشیات ایکٹ انا رداٹ مقدمہ نوشتہ کرسا جاست وپاست نا بناءِ کننگانے۔
