اسلام آباد۔ 17 اگست (اے پی پی) وزیراعظم نا کوآرڈی نیٹر جان جوڑی ڈاکٹر مختار احمد پارینے کہ منکی پاکس نا 90 آن 95 درسد ناجوڑ دراخ جوڑ مریرہ، بنجائی حکومت و غٹ صوبائی حکومت آک دا بابت آگاہی مہم نا بناءِ کیرہ، بارڈر ہیلتھ سروسز ءِویجلینس کننگانے ، غٹ جہانی جہاز آتا سکریننگ مریک۔ داخیال آتا درشانی ءِ او ہفتہ نادے آ منکی پاکس نا بابت اسہ پریس کانفرنس اس کرساکرے۔ اوپارے کہ منکی پاکس نا سویلی افریقہ نا انسان تیٹی 1970 اٹی تشخیص مس، منکی پاکس نا علامت 4 آن 15 دے اٹی پاش مریک، اِل، جون اٹی دڑد، غدود نا ودنگ منکی پاکس نا نشانی ءُ، اگہ کس اسے ٹی نشانی پاش مرے تو اودے آئیسولیٹ مرے۔ اوپارے کہ میڈیا ءِ منکی پاکس نا بابت آگاہی ودی کننگے۔ اوپارے کہ 2023 آن داتم اسکان ملک اٹی منکی پاکس نا 11 کیس مثبت رپورٹ مس، منکی پاکس اٹی اِل انا حالیت اٹی لس اِل انا دواہلنگ مریک۔ ڈاکٹر مختار احمد پارے کہ ملک اٹی منکی پاکس نا حالیت آتا جاچ ءِ ہلنگ نا بابت وزیراعظم نا کماشی ٹی منکی پاکس نا بابت اہم دیوان اس مس، وزیراعظم ءِ ٹیسٹنگ لیبارٹری، کٹ و دوائی تا بابت حوال تننگا۔ وزیراعظم ءِ بالی پٹ، بارڈر و ہسپتال آتیا بست وبند آتا بابت معلومدار کننگا، وزیراعظم ءِ سکریننگ نا بابت ہم حوال تننگا۔ اسہ سوج اسے نا ورندی ٹی اوپارے کہ منکی پاکس نا مریض ءِ دُوخلنگ آن ناجوڑی لگنگ نا گڑتی مریک ولے منکی پاکس تہوانا کمک اٹ تالان مروک ءُ ناجوڑی اس اف۔ اسہ سوج اسے نا ورندی ٹی اوپارے کہ بارڈر ہیلتھ سروسز ءِ ویجلینس کننگانے، غٹ جہانی جہاز آتا سکریننگ مریک ولے داڑے د اپاننگ ہم المی ءِ کہ گڑاس مریض بیدس نشانی آن ہم مننگ کیرہ سد درسد ٹریکنگ ممکن اف۔ اوپارے کہ منکی پاکس نا اولیکو کیس خیبرپختونخواغان رپورٹ مس۔ ناجوڑی نا تشخیص و درمان نا بابت آگاہی نا بارواٹی اسہ سوج اسے نا ورندی ٹی اوپارے کہ بنجائی حکومت و غٹ صوبائی حکومت آک ہم دا بابت آگاہی مہم نا بناءِ کیرہ۔
