اسلام آباد۔ 17 اگست (اے پی پی) بنجا ئی وزیر حوالکاری و شینکاری ، قومی میرات و دودوربیدہ عطاء اللہ تارڑ پارینے کہ ملک اٹی سازش نا سرغنہ عمران خان و کمکار فیض حمیدئس، پاک فوج اٹی خود احتسابی نا تینا مکینزم اسے، جاست وپاست نا دنگ ءِ ودفسا نظر بننگ ءِ، وزیراعلیٰ پنجاب مریم نواز صوبہ ٹی بجلی نا صارف آتیکن بھلو ریلیف اسے نا پڑو کرے، نواز شریف نا کماشی ٹی مسلم لیگ (ن) مدام الس نا خذمت ءِ کرے و السی خذمت نا داسفر برجاسلک۔ ہفتہ نادے آ داڑے پی ٹی وی ہیڈ کوارٹر زاٹی پریس کانفرنس آن تران کرسا بنجائی وزیر حوالکاری پارے کہ محمد نواز شریف نا کماشی ٹی مسلم لیگ (ن) مدام السی خذمت و افہام و تفہیم نا سیاست کرے۔ محمد نواز شریف 90ء نا دہائی ٹی سویلی ایشیاء نا اولیکو موٹروے ءِ تعمیر کرفے و ولدا مچ آ ملک اٹی موٹرویز نا جال اس تالان کرے، کاروباری آسانی ودی کرے ہرانا رداٹ پاکستان نا اکنامک ریفارمز ایکٹ بس دااولیکو ایکٹ ئس ہراکاروباری برادری ءِ آسراتی فراوان کرے۔ اوپارے کہ نواز شریف ایٹمی دھماکہ کرے، موٹرویز نا جال تالان کرے، بجلی نا ڈٹ خلک۔ بنجائی وزیر پارے کہ پنجاب حکومت 500 یونٹ اسکان بجلی نا بل آتیٹی اِرا تُو اکن فی یونٹ 14 روپئی کمتی کرینےو دا مسخت کن 45 ارب روپئی نا بھلو زراس جتا کرینے ہرانا تاریخ اٹ ہچ ءُ درور اس ملیپک۔ اوپارے کہ پنجاب حکومت نا کنڈآن الس ءِ ریلیف فراوان کننگ کن بھاز بھلو گام اس ہرفنگانے۔ اوپارے کہ 2018ء آن مست کبینی 4 درسد ئس، و شرح نمو 6 درسد، اوکان پد اسہ دورا س ہند ن ءُ بس ہراٹی کبینی 22 درسد آن ہم بڑزا ہنا، دادورا ٹی 190 ملین پاؤنڈ و توشہ خانہ نا ٹیکی تے پلنگا، سائفر آ جلہو کننگا۔ اوپارے کہ داسہ دُوارہ کبینی 11 درسد آ بسنے و غٹ جہانی مالیاتی ادارہ و جریدہ غاک پاننگ ءُ کہ کبینی ٹی پین کمتی بریک۔ بنجائی وزیر پارے کہ وزیراعظم یوم آزادی نا وخت آ الس ءِ پیٹرولیم مصنوعات آتا نہاد آتیٹی کمتی نا ٹیکی تس۔ داکان مست وزیراعظم 200 یونٹ اسکان بجلی کاریم اٹ اتوک آ بجلی صارف آتے مسہ تُواکن پنجا ارب روپئی نا سبسڈی تس ہرا بھلو گام اس ئس۔ اوپارے کہ بنجائی حکومت و پنجاب حکومت بجلی نا نہاد آتیٹی کمتی کن بھلو گام گیج کریر تانکہ الس ءِ ریلیف ملنگ کے۔ حالیت آتیٹی گچینی اتنگ و الس ءِ ریلیف تننگ کن انت کہ گام اس ہرفوئی تما ، نواز شریف نا کماشی ءِ ہرفنہ۔ بنجائی حکومت شہباز شریف نا کماشی ٹی و پنجاب حکومت مریم نواز نا کماشی ٹی السی ایجنڈا غا کاریم کننگ ءِ۔ الس ءِ ریلیف فراوان کرسا دم کشنہ۔ لیفٹیننٹ جنرل (ر) فیض حمید نا دزگیری نا بابت بنجائی وزیر حوالکاری پارے کہ پاک فوج شفاف جاست وپاست کرینے، فوج اٹی خوداحتسابی نا تینا میکنزم اسے۔ پاک فوج انا شمار دنیا نا گچین ادارہ غاتیٹی داسوب آن مریک کہ او خوداحتسابی آ باور کیک۔ اوپارے کہ دا جاست وپاست نا دنگ پین ودسا نظر بننگ ءِ۔ اوپارے کہ اسہ سیاسی جماعت اسے نا لیڈر ملک اٹی بے چیٹی و بشخنگ نا سیاست کرے، او مخلوق تون گٹھ جوڑ کرسا ملک اٹی بدامنی تالان کرے و ملکی سالمیت ءِ نسخان تننگ نا کوشست کرے۔ بنجائی وزیر پارے کہ ملک اٹی بے چیٹی تالان کننگ کن دا غٹ سازش نا سرغنہ عمران خان و کمکار لیفٹیننٹ جنرل (ر) فیض حمید و ایلومخلوق ئسر، بانی چیئرمین پی ٹی آئی نا کماشی ٹی گٹھ جوڑ کاریم کریرہ۔ اوپارے کہ جاست وپاست نا دنگ پین ودک۔ اوپارے کہ کس اسے موکل تننگ مفک کہ اوملک اٹی بھسکاری تالان کے۔ بنجائی وزیر پارے کہ بانی چیئرمین پی ٹی آئی ہمومخلوق تون اواری اٹ پاریسس کہ بایدے طالبانک پدی بروسر، اوطالبان تے پدی ایس و داڑے جاگہ تس، اینو ملک اٹی امن وایمنی نا خراب حالیت آتا زموار دافک ءُ۔ اوپارے کہ بانی چیئرمین پی ٹی آئی نا کماشی ٹی بے چیٹی تالان کننگ نا کوشست آتیٹی دامخلوق اونا حصہ ئسر، اوقومی سلامتی ءِ نسخان تس، ملک اٹی بے چیٹی تالان کرے ، شاہدی مون آ بننگ ءِ کہ بانی چیئرمین پی ٹی آئی نا رابطہ بحال ئس۔ نئے بیرہ او تحریک بے پتی ٹی گٹھ جوڑ نا سیاست کرے بلکن زندان آن ہم کلہورسانی برجائس۔ اوپارے کہ نن پاک فوج انا خوداحتسابی نا عمل نا ستاءِ کینہ۔ دا مثبت ءُ گام اسے ہرکس کہ ملک اٹی بے چیٹی تالان کیک اونا انجام ہندامریک۔ اوپارے کہ ایلو ادارہ غاتے ہم خوداحتسابی کننگے و دانا دنگ بایدے گیشتر مرے۔ الس ءِ بجلی نا نہاد آتیٹی ریلیف نا بابت او پارے کہ بنجائی حکومت بلوچستان نا حکومت تون اواری اٹ شمسی توانائی آ ٹیوب ویل خلنگ نا اسیجائی ڈٹ اسے نا بناءِ کرینے۔ بلوچستان اٹی 28 ہزار سولر ٹیوب ویل خلنگک، داڑآن بجلی نا بچت مریک و بزغرآتے ریلیف ملک۔ اومستی پارے کہ وزیراعظم شہباز شریف رائٹ سائزنگ و ڈاؤن سائزنگ نا بابت ہم اسہ دیوان اسے نا کماشی ءِ کرینے۔ ہراادارہ غاک سرکاری خزانہ غا بھاریم ءُ اوفتا بابت سلاہ بٹنگانے۔ اوپارے کہ بروک آ وخت اٹی داڑآ پین کاریم مریک۔ بنجائی وزیر حوالکاری پارے کہ لطیف کھوسہ ءِ دروغ و بہتان والا ہیت آک زیب تفسہ ، دروغ، بہتان و دوبہ خلنگ اونا لیڈر نا وطیرہ مسنے و او ہندا وطیرہ ءِ تینا کرسا داوڑنا ہیت کننگ ءِ، داہمو سازش ءِ ہرا بانی چیئرمین پی ٹی آئی و اونا حواریک پی ٹی آئی دور اٹی چیف جسٹس نا اُرائی نا بارواٹی کریسر و اوفتے انصاف نا مون آ سلفنگادا مائنڈ سیٹ اینو ہم برجاءِ۔ اوپارے کہ پی ٹی آئی اوفتا برخلاف ہرامہم نا بناءِ کرینے ، دااسُل سرسہب مفک۔ اسہ سوج اسے نا ورندی ٹی بنجائی وزیر پارے کہ بجلی نا بابت مہالو آن وزیراعظم اسہ ٹاسک فورس اس جوڑ کرینے ہرا تینا کاریم ءِ کننگ ءِ، اوٹی آئی پی پیز نا باندات آتیا ہم نظرثانی کننگ انگ ءِ، بجلی نا نہاد آتے شیف اتنگ کن کاریم کننگ انگ ءِ، داکاریم ءِ نن مارچ انا تُو اٹی بناکریسن۔ بجلی دُزی ناتوننگ کن صوبائی حکومت آتون اواری اٹ کاریم کننگک۔ سولرائزیشن نا کنڈآ صوبائی حکومت آتون اواری اٹ کاریم کننگ اُن۔ اوپارے کہ بجلی دُزی نا توننگ کن کریک ڈاؤن کننگک، بجلی نا نہاد آتیٹی ودکی نا ایلو سوب آتیا ہم نظرثانی مریک و اونا پائیدار و دیرپا ایسر اس کشنگک۔ اسہ پین سوج اسے نا ورندی ٹی ا وپارے کہ پاک فوج اٹی خوداحتسابی ستاکڑزک، سیاسی نیام تمنگ و کرپشن نا برخلاف پاک فوج گام اس ہرفسا مثال قائم کرینے ایلو ادارہ غاک ہم دانا بایدے تقلید ءِ کیر۔ اسہ پین سوج اسے نا ورندی ٹی اوپارے کہ گوازی تیا کس اسے اختلاف اف، میڈیا نا توسط اٹ وزیراعلیٰ خیبرپختونخوا ءِ پاوہ کہ او الس ءِ گوازی تا آسراتی فراوان کے۔ خیبرپختونخواٹی جوان ءُ سپورٹس مین ارے، ننا کرکٹ ٹیم اٹی ہم چندی گوازی گر آتا تعلق خیبرپختونخواغان ءِ۔ اوپارے کہ ارشد ندیم قوم انا گمرءِ، نن خوانہ کہ ارشدندیم کون آ ورناک داملک انا پن ءِ روشنا کرسا کیر۔
