اسلام آباد۔ 16 اگست (اے پی پی) وزیراعظم محمد شہباز شریف ملک اٹی نہادی خل تا صنعت نا شونداری و اوفتا برآمد آتیٹی ودکی کن بشخ اٹی اصلاحات درستی راستی کرفنگ نا فیصلہ کرسا پارینے کہ نہادی خل تا روایتی وڑاٹ کانڑکنی آن دا نہادی میرات آتے زیان کننگ انگ ءِ، بنجائی حکومت گلگت بلتستان اٹی نہادی خل تا کانڑکنی ، تراشنگ وویلیو ایڈیشن نا صنعت نا جہانی آب اتون ہم گرنچ پائلٹ پروجیکٹ نا بناءِ کیک۔ جمعہ نادے آ وزیراعظم میڈیا آفس آن جاری بیان نا رداٹ وزیراعظم محمد شہباز شریف نا کماشی ٹی نہادی خل تا صنعت و شونداری و دا بشخ انااصلاحات نا بابت جاچ دیوان جمعہ نادے آ داڑے اڈہلک۔ دیوان اٹی بنجائی وزیر جام کمال خان، خالد مقبول صدیقی، احدخان چیمہ، محمد اورنگزیب، رانا تنویر حسین ، ڈاکٹرمصدق ملک، گورنر اسٹیٹ بینک جمیل احمد، وزیراعظم نا کوآرڈی نیٹر رانااحسان افضل، گلگت بلتستان، آزاد کشمیر و خیبرپختونخوا نا چیف سیکرٹری و تعلقدار بڑزکو کمامدارآک بشخ ہلکر۔ دیوان ءِ ملک اٹی نہادی خل تا کاریم نا کچ، کانڑکنی نا ساڑی آ وڑوڈول و برآمد آتا بابت معلومدار کرسا پاننگاکہ گلگت بلتستان ، خیبرپختونخوا و آزاد کشمیر اٹی نہادی خل تا بھلو کوڑی اس ساڑی ءِ، داعلاقہ غاتیٹی کانڑ کنی کن روایتی وڑاٹ تینا کننگ انگ ءِ ہرافتا سوب آن نہادی خل تا زیان مننگ ءِ، خام مال زیات تر اسمگل مرسا ایلو ملک آتیٹی ویلیو ایڈیشن آن پد مچ آ دنیا ءِ برآمد کننگک۔ دیوان ءِ پاننگاکہ بھلو کچ اسے ٹی کوڑی تیان پد ہم پاکستان آن نہادی خل تا برآمد آتا کچ منہ ملین ڈالر ءِ۔ وزیراعظم ءِ نہادی خل تا صنعت و دابشخ انا اصلاحات نا بابت سلاہ پیش کننگا۔ دیوان ءِ گلگت بلتستان اٹی نہادی خل تا بابت اسہ کلسٹر اس جوڑ کننگ نا سلاہ ہم پیش کننگا۔ وزیراعظم سلاہ تیا عملدرآمد نا زمواری ءِ بنجائی وزیر نجکاری ءِ ترسا اسہ ہفتہ ٹی گلگت بلتستان اٹی پائلٹ پروجیکٹ نا لائحہ عمل ءِ پیش کننگ نا پارت کرے۔ وزیراعظم پارے کہ نہادی خل تا صنعت نا شونداری و بشخ انا اصلاحات نا سٹیئرنگ کمیٹی نا تینٹ کماشی ءِ کیوہ۔ اوپارےکہ بنجائی حکومت گلگت بلتستان اٹی نہادی خل تا کانڑکنی، تراشنگ و ویلیو ایڈیشن نا صنعت نا جہانی آب اتون ہم گرنچ پائلٹ پروجیکٹ نا بناءِ کیک، دا بابت بنجائی حکومت گلگت بلتستان ءِ پورو مالی کمک فراوان کیک۔ وزیراعظم پارے کہ ملک انا بدبختی ءِ کہ 77 سال اٹی دا بشخ آ چکار کننگتو ، نہادی خل تا روایتی وڑاٹ کانڑ کنی آن نہادی میرات زیان کننگ انگءِ، اسہ تُو اٹی جہانی آب اٹ ہم گرنچ پوسکن آ لائحہ عمل اس ٹہیفسا اونا نفاذ کن گام گیج آتا بناءِ کننگے۔ وزیراعظم پارے کہ نہادی خل تا صنعت و دابشخ انا اصلاحات نا بابت عملی گام گیج و نتیجہ غاتے پیش کننگے، نہادی خل تا اسمگلنگ نا موکل اسُل تننگ مفک، دا بابت گلگت بلتستان حکومت تون سلابت آن پد اسہ ہفتہ ٹی رپورٹ پیش کننگے۔ وزیراعظم پارے کہ پاکستان اٹ نہادی خل تا جہانی کہول آ رواج سرٹیفکیشن آتا دوئی کننگ کن اولیتی بنداوتیا گام گیج کننگے۔ وزیراعظم ءِ پاننگاکہ پاکستان اٹ داوخت آ نہادی خل تا کانڑکنی نا بابت 178 بھلو لیسن تننگانے وخت اس کہ نہادی خل تا 18 وڑ ارے، پاکستان نا نہادی خل تا برآمد آتا 80 درسد بشخ خام مال آ تالان ءِ، نہادی خل تا صنعت نا شونداری آن ملکی برآمد آتیٹی ودکی مریک و روزگار نا پوسکن ءُ وارخواہی ودی مریک۔ وزیراعظم نہادی خل تا پوسکن کانڑکنی، تراشنگ، پالشنگ و ویلیو ایڈیشن نا بابت پاکستانی افرادی قوت نا کسبی تربیت کن اسہ جامع لائحہ عمل اسے نا نفاذ نا ہم پارت کرے۔
