پاکستان اٹی ایم پاکس تون مون تننگ کن گام گیج آک است جم ءُ، مردان اٹی ایم پاکس نا شکبر کیس انا رزلٹ پازیٹو ءِ، ڈاکٹر مختاراحمد بھرتھ

اسلام آباد۔ 16 اگست (اے پی پی) وزیراعظم نا کوآرڈی نیٹر جان جوڑی ڈاکٹر مختار احمد بھرتھ بارڈر ہیلتھ سروسز ءِ غٹ انٹری پوائنٹ آتیا سخت چاروکی نا پارت ہم کرسا پارینے کہ پاکستان اٹی ایم پاکس تون مون تننگ کن گام گیج آک است جم ءُ، خیبرپختونخوا نا ضلع مردان اٹی ایم پاکس نا شکبر کیس انا رزلٹ پازیٹیو بسنے، زہمی بندغ نا کانٹیکٹ ٹریسنگ نا بناءِ کننگانے و پین مخلوق نا وڑتے ہلنگ انگ ءِ۔ وزارت جان جوڑی آن جاری بیان نا رداٹ داخیال آتا درشانی ءِ او جمعہ نادے آتینا کماشی ٹی ایم پاکس نا بابت جاچ دیوان اٹی گپ وتران کرسا کرے۔ دیوان اٹی ڈی جی ہیلتھ ، ایگزیکٹیو ڈائریکٹر این آئی ایچ و ایلو چاہندارآک بشخ ہلکروخت اس کہ ویڈیو لنک آ صوبہ غاتا نمائندہ غاک ہم بشخ ہلکر۔ دیوان اٹی ڈائریکٹر بارڈر ہیلتھ سروسز ایئرپورٹ و ایلو انٹری پوائنٹ آتیا گام گیج آتا بارواٹی معلومدار کرے۔ دیوان ءِ پاننگانے کہ پاکستان اٹ ایم پاکس نا اولیکو کیس کنفرم مسنے۔ ڈاکٹر مختار احمد بھرتھ پارے کہ خیبرپختونخواضلع مردان اٹی ایم پاکس شکبر کیس انا رزلٹ پازیٹیو بسنے۔ زہمی بندغ خلیجی ملک آن بسنے۔ زہمی بندغ نا کانٹیکٹ ٹریسنگ نا بناءِ کننگانے و پین مخلوق نا وڑ ہلنگ انگءِ اوبارڈر ہیلتھ سروسز ءِ غٹ انٹری پوائنٹ آتیا سخت چاروکی نا پارت ہم کرینے۔ اوپارے کہ لمحہ بہ لمحہ حالیت آتا سخت چاروکی ءِ کننگ انگ ءِ۔ پاکستان اٹ ایم پاکس تون مون تننگ کن گام گیج آک است جم ءُ۔ مچ آ ملک اٹی جان جوڑی نا عملہ بالی پٹ آتیا سکریننگ و سرویلینس نانظام نا مانیٹرنگ کن بالی پٹ آتیا وزٹ کیک۔ ڈاکٹر مختار احمد بھرتھ پارینے کہ داگام آن بالی پٹ آتا کمامدارآتون اوار اوار صوبہ غاتون کوآرڈی نیشن ہم سوگو مریک۔ بالی پٹ آتیا سکریننگ نا گچین و جوان نظام اس ارے۔ وزارت جان جوڑی بارڈر ہیلتھ سروسز نا عملہ صوبہ غاتون پورو رابطہ ٹی ءِ۔ اوپارے کہ صوبائی حکومت آک ہم غٹ تر المی گام گیج آتے پک کننگ ءُ ، وزارت جان جوڑی الس ءِ ناجوڑی و دین تیان رکھ تخنگ کن عملی گام گیج آتے پک کننگ ءِ۔