راولپنڈی۔ 15 اگست (اے پی پی) پاک فوج انا سروک جنرل سید عاصم منیر پارینے کہ دشمن زموار آتا کنڈآن دروغ انا خبر و پروپیگنڈا تا کمک اٹ پاکستانی الس و سلہہ بند فوج انا نیام اٹ تعلق ءِ نزور کننگ نا کوشست کننگ انگ ءِ، مسکوہی فوجی تتون اوار قوم انا بدل مفروک مخ تفی ہموغٹ بے سود کوشست آتے بے سہب جوڑ کیک۔ آئی ایس پی آر نا رداٹ آرمی چیف جنرل سید عاصم منیر یوم آزادی نا وخت آ پاکستان آرمی نا مسکوہی فوجی تا اعزاز اٹی پروقار بیابخیری اس تس ہراٹی بھلو کچ اسے ٹی ریٹائرڈ فوجی آفیسر و ورناک بشخ ہلکر۔ آرمی چیف مسکوہی فوجی کارندہ غاتا خذمت آتے خراج تحسین پیش کرے۔ اوچیلنج آتا مقابلہ ءِ کننگ کن سیوت و استقامت نا اہمیت آ زور شاغا و مسکوہی فوجی تے پاکستان نا شونداری و شونہالی ٹی تینا اہم کڑد ءِ ادا کننگ نا تاکید کرے۔ مسکوہی فوجیک پاکستانی آرمی نا سرکڑدہ غا پت انا درشانی ءِ کرسا داخلی و خارجی سیکورٹی چیلنج آتون مون تننگ نا کوشست آتا مخ تفی نا قول کریر۔ دادود پاکستان آرمی و اونا مسکوہی فوجی تا نیام اٹ کڑمب آ رشتہ نا ڈیک ئس۔
