کوئٹہ۔ 15 اگست (اے پی پی)پاکستان مسلم لیگ (ن) نا صوبائی اسمبلی نا باسک میر زرین خان مگسی پارینے کہ ملک ءِ نن تینا باوہ و پیرہ غاتا عظیم قربانی تیٹی دوئی کرین دانا رکھ و شونداری و شونہالی داسہ ننا زمواری ءِ ننے تینا غٹ فروعی و گروہی اختلاف آتے است آن درسا و ہروڑنا تعصب آتیان ایڑترمرسا اسہ یکجا قوم اسے نا دروشم اٹ کاریم کروئی مریک۔ اوجشن آزادی نا وخت آ ملک و صوبہ ٹی شہید مروک آ سیکورٹی فورس آتا ورناتے خراج عقیدت پیش کرسا پارے کہ دا شہید آتا بے مٹ قربانی تا سوب آن اینو نن داچاگڑد اٹ پرامن زند ءِ تیر کننگ اُن۔ اوپارے کہ 14 اگست نا دے ننکن نعمت اسے آن کم اف بانی پاکستان قائد اعظم محمد علی جناح نا مریس جہد آن پد ملک ءِ آجوئی ملا ہرانا سوب آن اینو پاکستان مچ آ دنیا ٹی اسہ ناقابل تسخیر واک اس جوڑ مسنے ایٹمی واک مننگ نا سوب آن ایلو مسلم ملک آک پاکستان نا گمر محسوس کیرہ۔ داخیال آتا درشانی ءِ او یوم آزادی نا وخت آ مبارکبادی ترسا کرے ، صوبائی اسمبلی نا باسک میر زرین خان مگسی پارے کہ یوم آزادی ءِ اڈتننگ نا مسخت ہمو شہید آتا قربانی تے خراج تحسین پیش کننگ ءِ ہرافک ملک انا آجوئی کن تینا نہادی جون تے ندر بھلو واکداری اسے تون پیش کریر و پاکستان ءِ دنیا نا آجو ملک آتا نقشہ ٹی اوار کریر پاکستان نا ورناچین ءِ داہیت انا احساس مرے کہ آخبت اٹ داعظیم مملکت نا بھاگ دوڑ ءِ اوفتے سنبھالوئی ءِ۔ اوفتے تینے اقبال نا شاہین پک کروئی ءِ۔ او قائد نا ایمان، سیوت و تنظیم نا درس ءِ ہروخت تینا مون آ تخروداہم یات تخر کہ آجوئی شورشرابہ آخاسنجیدگی نا خواست کیک کہ نن تینا آجوئی نا رکھ ءِ ہراوڑکروئی ءِ۔ ملک ءِ شونداری نا کسر آ ہراوڑ دروئی ءِ۔ نن اسہ باشعور و عظیم قوم اسے اُن ہرادے تینا زمواری تا احساس ارے۔ آجوئی نا اظہار زندہ قوم تا نشانی ءِ پاکستان ننا شان ءِ۔
