اسلام آباد۔ 13 اگست (اے پی پی) وزیراعظم محمد شہباز شریف یوم آزادی ءِ جم وجوش اٹ اڈتننگ و لمہ وطن ءِ قائد نا پاکستان جوڑ کننگ نا عزم انا درشانی ءِ کرسا پارینے کہ غٹ زند انا بشخ آتیان تعلق تخوک آ بندغ آک دے و نن خواری کرسا پاکستان ءِ عظم تر جوڑ کیرہ، قومی سوگوی و ملک اکن ہرگڑانا قربانی ءِ ایترہ، انشاء اللہ دا ملک ضرور قائد اعظم نا پاکستان جوڑ مریک ، صنعت، کشت وکشار، واپار و ایلو بشخ آتے فعال و گچین کننگ کن پیدواری خڑچ آتیٹی کمتی المی ءِ، بجلی و توانائی نا بشخ اٹی گام گیج و کوشست آتیٹی قوم ءِ فائدہ رسینگک، ارشد ندیم نا شاندار سرسہبی آن جشن آزادی نا خوشی پین زیات مسنو۔ داخیال آتا درشانی ءِ او بنجائی کابینہ نا دیوان اٹی گپ وتران کرسا کرے۔ وزیراعظم پارے کہ پگہ یوم آزادی نادے ءِ مچ آ قوم جم وجوش اٹ اڈایتک، و داڑآنن غٹ داہیت انا قول ءِ کینہ کہ پاکستان نا شونداری وخذمت کن غٹ زند انا بشخ آتیان تعلق تخوک آ بندغ آک دے و نن خواری کرسا و مستین اٹ زیان مروک آ وخت آن سبخ ہلسا داملک ءِ تعمیر کرسا اودے عظیم تر جوڑ کیرہ۔ داہموتم مننگ کیک ہراتم نن دے و نن خواری کین و ایثار وقربانی ءِ تینا شعار جوڑ کین۔ انشاء اللہ دا ملک ضرور قائد اعظم نا پاکستان جوڑ مریک۔ وزیراعظم پارے کہ داسال یوم آزادی نا بابت قوم انا ہیرو ارشد ندیم نا سوب آن جشن آزادی نا خوشیک دوبالامسنو۔ ارشدندیم اللہ تعالیٰ نا فضل وکرم و تینا خواری و ریاضت اٹ 40 سال آن پد پاکستان ءِ اولمپکس مقابلہ غاتیٹی گولڈمیڈل اس کٹسا تس۔ وزیراعظم پارے کہ ارشد ندیم قوم اکن اسہ جوان ءُ درور اسے۔ ارشد ندیم مستین اٹ مقابلہ غاتیٹی بشخ ہلک ولے او ہمت ءِ اِلیتو و او مایوس متو، دے و نن نا خواری، لمہ وباوہ نا دعا و کوچ انا ٹریننگ نا سوب آن ارشد ندیم مچ آ دنیا ٹی پاکستان نا پن کاٹم ءِ بڑزکرے ۔ بنجائی کابینہ ارشدندیم ءِ خراج تحسین پیش کیک۔ ارشدندیم ءِ میڈل تننگ کن نن صدر پاکستان ءِمکتوب اس مون تسونن۔ وزیراعظم پارے کہ او ارشد ندیم ءِ وزیراعظم ہاؤس آ بٹنگانے ہم۔ اونا مسخت قوم ءِ پاروئی ءِ کہ قومی ہیروتا عزت و توقیر ننا غٹ آ فرض ءِ۔ ارشد ندیم قومی یکجہتی، سیوت و سخا نا درور ءِ۔ کابینہ نا دیوان آن تران اٹی زرگزران نا گچینی کن کروک آ گام گیج آتا ذکر ءِ کرسا وزیراعظم پارے کہ بجلی نا بشخ اٹی بھاز خواری و کوشست مسنے۔ اوٹی وزیر پاور، نائب وزیراعظم ، وزارت خزانہ ، وزارت واپار ووزارت ڈٹ بندی تون اوار ایلو وزارت آتا کوشست آک اوار ءُ۔ انشاء اللہ ہراخواری مسنے اوڑآن قوم ءِ فائدہ رسینگک۔ وزیراعظم پارے کہ نن اسہ ہیت اس بایدے یات تخن کہ صنعت ، کشت وکشار، واپار ، ایلو بشخ آتے فعال و گچین کروئی ءِ تو پیدواری خڑچ آتیٹی کمتی اتوئی مریک۔ پیدواری خڑچ آتیٹی کمتی آن بیدس برآمد آتے ودفنگ و اوفتے مسابقتی جوڑ کننگ ممکن اف۔ داٹی بجلی نا نہاد نا اہم ءُ کڑد اسے۔ وزیراعظم پارے کہ ایف بی آر ننا اولیت آتا اہم ءُ بشخ اسے، ایف بی آر نا احیائے نو و محصولات اٹی گچینی آن بیدس مالی گنجائشت ملک نئے قوم مون آ شون ہلنگ کیک۔ بجلی وتوانائی و ایف بی آر ننکن اہم اولیتی بشخ ءُ و انشاء اللہ بطور ٹیم ورک کاریم کرسا ننے سرسہبی ملک۔ وزیراعظم کابینہ نا باسک آتے معمول نا تاخیر ءِ چٹفنگ و فائل ورک ءِ فعال کننگ نا پارت کرے۔ اوپارے کہ نن تدوک آ 6 تُو اٹی پورو کوشست کرینن کہ اسلوب حکمرانی ءِ ہراحداسکان ممکن مرے گچین کننگ کین۔ گورننس ءِ ڈیجیٹائز کننگ کن بایدے پورو کوشست مرے۔ نن وزیراعظم آفس اٹی کیہی تُو آن اوڑآ کاریم کرینن و گڑاس گچینی بسنے ولے نن اودے پین فعال کروئی ءِ۔ ہروزارت ءِ پیپر لیس بایدے کننگے۔ وزیر آتون پورو واکداری ارے و کاریم نا کچ ہم ساڑی ءِ۔ نن ایف بی آر تون اوار کیہی ادارہ غاتیکن سلاہکار تعینات کرینن۔ پبی خواری کرسا مون آہِننگ المی ءِ انتئے کہ وخت کس اسے نا انتظار ءِ کپک۔ اللہ تعالیٰ ننے ہراوخت ءِ تسنے نن اودے پبی وڑاٹ کاریم اٹ اتین، ولدا گڑانن سرسہبی آن ہمکنار مننگ کینہ۔ وزیراعظم پارے کہ مستین نا 77 سال انا ناجوڑی آن جان ءِ خلاص کننگ المی ءِ۔ قوم ہم اونا اومیت کننگ اٹی ءِ۔ معمول نا وڑوڈول داسہ اسُل چلینگ انگ کپک۔
