کوئٹہ۔ 13 اگست (اے پی پی)پاکستان پیپلزپارٹی بلوچستان نا سیکرٹری حوالکاری سردار سربلند جوگیزئی پارینے کہ پاکستان نا انقلاب آفرین جہد قائد اعظم نا ولولہ انگیز کماشی ٹی مملکت خدائیداد پاکستان نا جوڑ کننگ نا دروشم اٹ پورو مس داگلشن نا تزئین اٹ لکھ آ مسلمان تا دتر اوارءِ، 77 می یوم آزادی نئے بیرہ پوسکن آ چین اکن کسر نا ڈیواءِ، بلکن ننا بزرگ آک داعظیم وطن ءِ دوئی کننگ کن ہرا قربانی تے تسوسر اوفتے ہم تالان کننگ نادے ءِ۔ پاکستان نا77 می یوم آزادی نا وخت آ تینا اسہ کلہو اسے ٹی سردار سربلند جوگیزئی پارے کہ ننے غٹ ءِ پاکستان نا قومی دے آ قول کروئی مریک کہ نن غٹ پاکستان نا سالمیت شونہالی و شونداری کن جہد کینہ ۔ اوپارے کہ وطن عزیز ءِ دوئی کننگ کن ننا بزرگ آک بے شمار قربانی تسر و بھلو جہد اسے آن پد پاکستان دنیا نا نقشہ غا نمودار مس داسہ راج انا غٹ بندغ آتا فرض جوڑ مریک کہ او وطن نا سالمیت و شونہالی کن تینا فرضءِ سرایتر۔ اوپارے کہ نن دا خوشی ناقومی دے آ ہموشہید آتے اسُل است آن دپن ہرافک دا ملک انا آجوئی کن تینا جون تے ندر کرسا قربانی تسر اوفتا سوب آن دا آجوملک انا آجو فضاٹی زند ءِ تیر کننگ اُن۔ اوپارے کہ داوخت آ پاک فوج و ایلو کانود نافذ کروک آ ادارہ غاک مچ آملک اٹی دہشت گرد آتا برخلاف آپریشن اٹی لگوک ءُ نن اوفتے باور کرفنہ کہ مچ آپاکستانی قوم اوفتے تون ہم کوپہ سلوک ءِ۔
