کوئٹہ۔ 13 اگست (اے پی پی) اسپیکر بلوچستان اسمبلی کیپٹن (ر) عبدالخالق اچکزئی پارینے کہ جشن آزادی ءِ اڈترسا نن قول کین کہ پاکستان نا شونداری کن ہرممکن کوشست کینہ، ورناچین بایدے دایات تخے کہ اگہ اینو نن آجو ملک اٹی ساہ ہلنگ اُن تو ہمو شہید آتا سوب آن ہرا تینا دروءِ ننا اینو کن ندر کریر آجوئی اسہ بھلو نعمت اسے ، داڑآن ود دنیا ٹی ہچ ءُ گڑاس اف۔ آجوئی نادے ءِ اڈتننگ ہم ننا غٹ آ المی ءِ۔ داخیال آتا درشانی ءِ او 78 می یوم آزادی نا رداٹ ’’اے پی پی‘‘ تون خصوصی گپ وتران کرسا کرے۔ اسپیکر بلوچستان اسمبلی پارے کہ پاکستان نا بنداوتیٹی لکھ آ شہید آتا دتر اوار ءِ۔ اسہ آجو مملکت اسے کن مسلمانک بے شمار قربانی تسر۔ اوپارے کہ تاریخ گواہ ءِ کہ بھارت آن بروک آ ٹرین مسلمان تا لاش آتیان پُر لاہور آ سرمس تو ہم داجاگہ نا مسلمانک پاکستان اٹ رہینگوک آ ہندو و ایلو مذہب آتا مخلوق ءِ رکھ فراوان کریر۔ اوپارے کہ ہندوستان اٹی اینو ہم مسلمان تیا ظلم کننگ انگ ءِ، مقبوضہ کشمیرہم ہندوستان نا ظلم آتا داستان تیان اسہ داستان اسے۔ اینو ہراتم نن مقبوضہ کشمیر اٹی بھارتی بربریت ءِ خننہ تو ننے احساس مریک کہ آجوئی اسہ نعمت اسے۔ اوپارے کہ قائد اعظم محمد علی جناح ننے آ ہرا احسا ن ءِ کرینے نن اواحسان ءِ اسُل است آن دننگ کپنہ ولے نن پاکستان ءِ جناح نا پاکستان جوڑ کرسا قائد اعظم محمد علی جناح نا روح ءِ سکون ایتنگ کینہ۔ اوپارےکہ آجوئی بھاز بھلو نعمت اسے و دانا رکھ ننا اجتماعی و قومی زمواری ءِ۔ آجوئی نا قدر و قیمت ءِ مقبوضہ کشمیر و فلسطین نا مسلمان تیان اَرفنگے ہرا بھارت و اسرائیل نا ظلم انا گواچی ءُ۔ اوپارے کہ آجوئی نا جشن ءِ اڈترسا نن قول کین کہ پاکستان نا شونداری کن ہرممکن کوشست کینہ، وطن عزیز نا سالمیت آ ہچ ءُ آنچ اس بننگ کن اِلیپنہ و وخت بننگ آ پاک فوج، پولیس و کانود نافذ کروک آ ادارہ غاتون ہم کوپہ سلنہ ہرا دہشت گردآتا برخلاف سربکف ءُ۔ نن قول کینہ کہ تینا ملک اکن ہروڑنا قربانی ایتنہ ، کیپٹن (ر) عبدالخالق اچکزئی پارے کہ یوم آزادی نا پروگرام تیٹی ورناتا جوش وخروش تون بشخ ہلنگ ستاکڑزک، اوپارے کہ ورناچین یات تخے کہ اگہ نن اینو آجوئی اٹ ساہ ہلنگ اُن تو دا آجوئی ٹی سرکڑدہ غاتا دتراوار ءِ آجوئی بھاز بھلو نعمت اسے ، آجوئی نا قدر و قیمت ہموفتے معلوم ءِ ہرا غلامی نا زند ءِ تیر کننگ ءُ، اوپارے کہ بھارت اٹی مسلمان تیا ظلم انا ہراستم ءِ کننگا، فلسطین اٹ اسرائیل نا ظلم و کشمیر آ بھارتی کوزہ ءِ ہُننگے تو نن آجوفضا ٹی ساہ ہلنگ کن خدانا شکر ءِ ادا کین۔ پاکستان نا آخبت ورناتتون گنڈوک ءِ و ورناتے پاکستان نا آجوئی ءِ برقرار تخنگ کن مثبت سوچ اتون مون آ بروئی مریک انتئے کہ ہنداورناک مریرہ ہرا پاکستان نا آخبت نا رُمب ءِ سنبھالرہ۔
