اسلام آباد۔ 12 اگست (اے پی پی) چیئرمین سینیٹ سید یوسف رضاگیلانی پارینے کہ ورنا چین ہرملک انا نہادی میرات مریک، ورناک ملک و قوم انا روشنا آخبت کن تینا لائخی و بڑزکو تعلیم آن تینے آراستہ کیر، نن ذاتی فائدہ غاتیان ایڑتر مرسا ملکی مفاد ءِ ملحوظ خاطر تخن و ملک انا شونداری و شونہالی آ تینا چکار ءِ تخن۔ سینیٹ سیکرٹریٹ آن جاری بیان نا رداٹ داخیال آتا درشانی ءِ چیئرمین سینیٹ ورناتا جہانی دےا نا وخت آ تینا کلہو اٹی کرے۔ چیئرمین سینیٹ سید یوسف رضاگیلانی پارے کہ ورناچین ہرملک انا نہادی میرات مریک خوش بختی نا ہیت ءِ کہ پاکستان نا 60 درسد آن زیات آبادی ورناتیا تالان ءِ۔ اوپارے کہ او پاکستانی ورناتے اینو نا دے انا رداٹ مبارکباد پیش کیک۔ پاکستانی ورناک ٹیلنٹ و لائخی تا دولت آن مالامال ءُ۔ چیئرمین سینیٹ ارشد ندیم نا درور ءِ ترسا پارے کہ ارشد ندیم اولمپکس گیمز اٹی جہانی ریکارڈ اس جوڑ کرسا ملک انا پن ءِ مچ آ دنیا ٹی روشناکرینے، ارشد ندیم پک کرے کہ حالیت آک ہراوڑ کہ مریر پدریسہ خواری و لگن اٹ سرسہبی نا دوئی کننگ ممکنءِ۔ اوپارے کہ ورناک تینا بہادری و عزم اٹ بھلو سرسہبی دوئی کرسا قوم انا کاٹم ءِ گمر اٹ بڑز کننگ کیرہ، و ورناک بدلی نا اصلی ایجنٹ ءُ ہرا خواری و لگن اٹ بھلو ہند اس دوئی کننگ کیرہ۔ ورناتا ملک انا شونداری و شونہالی کن کڑد بھاز اہمیت تخک۔ چیئرمین سینیٹ پارے کہ پاکستان نا شونداری و سوگوی کن جمہوری عمل اٹ ورناتا بشخ ہلنگ المی ءِ ۔ سید یوسف رضاگیلانی پارے کہ ملک انا شونداری، مون تروک چیلنج و ملکی زرگزران نا سوگوی کن المی ءِ کہ نن بابائےقوم قائد اعظم محمد علی جناح نا فرمان نا رداٹ کاریم ، کاریم و بیرہ کاریم آ چکار تخن۔ ملکی شونداری کن المی مسنے کہ نن ذاتی فائدہ غاتیان ایڑتر مرسا ملکی فائدہ غاتے ملحوظ خاطر تخن و ملک انا شونداری و شونہالی آ تینا چکار ءِ کین۔
