اسلام آباد۔ 12 اگست (اے پی پی) وزارت داخلہ دارالحکومت اسلام آباد اٹی پین اِرا تھانہ و سیکٹر آتیٹی چوکی جوڑ کننگ نا سلاہ ءِ مسترد کرے۔ وزارت داخلہ نا سینئر آفیسر پارے کہ بنجائی پولیس نا کنڈآن کارکڑد و کاریم نا کچ اٹی گچینی اتنگ کن سلاہ تننگاسس کہ دارالحکومت اسلام آباد اٹی پین اِرا تھانہ جوڑ کننگے و کرائم آوخت آکارروائی کن بنجائی دارالحکومت نا اِرا سیکٹر آتیا اسہ چوکی اس جوڑ کننگے۔ دا بابت آئی جی آفس آن معلوم مس کہ کم وود یک و نیم تُو مست اسہ بڑزکو کہولی دیوان اسے ٹی دارالحکومت اٹی ڈوہ انا کچ اٹی ودکی آ گڑتی نا درشانی ءِ کننگاسس اوکان پد آئی جی ءِ سینئر پولیس آفیسر آک سلاہ تسوسر کہ دارالحکومت اٹی گنجان آباد سیکٹرآتیٹی کرائم نا توننگ کن اِر اپوسکن ءُ تھانہ جوڑ کننگے و اوڑتون اوار ہر سیکٹر اٹی پولیس نا اسہ چوکی اس ہم جوڑ کننگے تانکہ کسبی ڈوہدار زموار آتا برخلاف دمدستی کارروائی کننگ مرے۔ آئی جی داسلاہءِ وزارت داخلہ ءِ گدریفیسس۔ وزارت داخلہ نا آفیسر نا رداٹ بنجائی پولیس نا دا سلاہ تے مسترد کننگانے۔ اونا سوب دادے کہ دارالحکومت اسلام آباد اٹی جوڑ تھانہ غاتا دنگ اربعہ زیات مفننگ نا سوب آن پین تھانہ جوڑ کننگ مفک بلکن تھانہ غاتا کچ ءِ ودفنگ ناجاگہ غا پولیس تینا کارکڑد ءِ گچین کننگ کن کاریم نا کچ ءِ گچین کے۔
