اسلام آباد۔ 12 اگست (اے پی پی) بنجائی وزیر امور کشمیر و گلگت بلتستان و سیفران انجینئر امیر مقام پنی آ کشمیری راہشون یاسین ملک اناطب انا بگڑینگ انگ نا حوال آتیا گڑتی نا درشانی ءِ کرسا پارینے کہ بھارتی زندان تیٹی داکان مست ہم کشمیری سرکڑدہ و بندی شہید مسنو۔ دوشنبے نادے آ تینا اسہ بیان اسے ٹی بنجائی وزیر پارے کہ بہادر کشمیری راہشون یاسین ملک انا جان جوڑی تشویشناک حداسکان بگڑینگ انگ بھاز فریشانی نا سوب ءِ۔ اویاسین ملک و ایلو کشمیری سرکڑدہ غاتا زند ءِ خطرہ غاتا بابت سیکرٹری جنرل اقوام متحدہ و جہانی ادارہ غاتے چٹھی نوشتہ کننگ نا ہم پڑو کرے۔ اوپارے کہ جہانی برادری ءِ چٹھی اس نوشتہ کرسا یاسین ملک و ایلو اسیر کشمیری سرکڑدہ غاتا حالیت زار آن معلومدار کیوہ، بھارتی زندان تیٹی داکان مست ہم کشمیری سرکڑدہ وبندیک شہید مسنو۔ امیر مقام پارےکہ کورونا دین انا دے تیٹی ہم مقبوضہ جموں وکشمیر و بھارتی زندان تیٹی کشمیری بندی تے جان جوڑی نا آسراتی تیان محروم تخنگاسس، تہاڑ زندان اٹی دروغ انا مقدمہ غاتیٹی بند یاسین ملک ءِ جان جوڑی نا گچین آسراتی فراوان کننگے۔ اوپارے کہ جہانی برادری اقوام متحدہ نا انسانی حق انا ادارہ یاسین ملک تون اوار ایلو کشمیری سرکڑدہ غاتا جان جوڑی و سلامتی ءِ لاحق بھلا خطرہ غاتیان دمدستی چکار تخر۔ اوپارے کہ بھارتی حکومت مقبوضہ جموں وکشمیر نا سیاسی راہشون و بندی تتون دہشت گرد والا سلوک ءِ بند کے، بھارتی حکومت بند کشمیری سرکڑدہ غاتے جان جوڑی نا آسراتی تفرسا اوفتا خون نا ناپاک حکمت عملی اسے آ کاریم کننگ ءِ، یاسین ملک ءِ گڑاس مس تو بھارت حکمران اونا زموار مریک۔ بنجائی وزیر امور کشمیر انجینئر امیر مقام کشمیری سرکڑدہ غاتون پورو یک جہتی نا درشانی ءِ کرے۔
