اسلام آباد۔ 12 اگست (اے پی پی) بنجائی وزیر داخلہ و انسداد منشیات محسن نقوی ورناتا جہانی دے آ قومی ہیروارشد ندیم و غٹ ورناتے خراج تحسین پیش کرسا پارینے کہ جیولین تھرور مقابلہ نا اولمپک چیمپیئن ارشد ندیم گولڈ میڈل ءِ کٹسا پک کرینے کہ پاکستانی یوتھ خواری کش و لائخ ءُ۔ ارشد ندیم پیرس اولمپکس اٹی بھلو کارکڑد اس نشان ترسا ورناتے پوسکن ءُ جوش و جوزہ اس تسنے۔ ورناتا جہانی دے آ تینا کلہو اٹی وزیرداخلہ محسن نقوی پارےکہ ورناک پاکستان نا غٹ آن بھلا قوت ءُ و دا پاکستان نا تقدیر ءِ بدل کننگ نا پورو لائخی تخرہ۔ پاکستانی ورناک زند انا ہر بشخ اٹی خداداد لائخی تے اٹ ملک انا پن ءِ روشنا کرینو۔ ورناک پاکستان نا روشنا آخبت آک ءُ۔ یوتھ آزرکاری شونہالی و تابناک پاکستان آ زرکاری ءِ۔ اوپارے کہ ورناتے اینو اخس واکدار کینہ ننا پگہ ہموخس ہی زیبا مریک۔ ورناتیکن ہندن ءُ بریبر چاگڑد اسے شون تروئی ءِ ہراڑے او تینا تخلیقی لائخی تا زی آ ملکی شونداری ٹی تینا بشخ ءِ شاغنگ کیر۔ اوپارے کہ پاکستان نا آبادی نا بھلا بشخ ورناتیا تالان ءِ، ورناتا لائخی تے مون آ اتنگ کن حکومت تون نجی بشخ ءِ مون آ بروئی مریک ۔ وزیرداخلہ ورناتا جہانی دے آ ورناتے واکدار کننگ کن پین گچین گام گیج کننگ نا عزم انا درشانی ءِ کرے۔
