اسلام آباد۔ 12 اگست (اے پی پی) اسپیکر قومی اسمبلی سردار ایاز صادق پارینے کہ زالبول آتے پورو وڑاٹ واکدار کننگ آن بیدس گرین اکانومی و پائیدار شونداری نا تغ پورو مننگ کپک، اومیت ءِ کہ ’’جینڈرایمپاورمنٹ و گرین اکانومی‘‘ نا سرحال آ اڈ ہلوک کانفرنس ننا کوشست آتا دوئی کننگ اٹ کمکار جوڑ مریک۔ دوشنبے نادے آداڑے کانفرنس آن تران کرسا اسپیکر جاپان نا وزیر مملکت توشیکو ابے تون اوار غٹ ملکی و درملکی مندوبین آتے بخیر کرسا پارے کہ زالبول آک ننا آبادی نا اسہ بھلو بشخ اسے ءُ ہرافتے واکدار کننگ آن بیدس گرین اکانومی و پائیدار شونداری ہدف آتا دوئی کننگ نا تغ پورو مننگ کپک، زالبول آتے واکدار کننگ و پائیدار شونداری نا دوئی کننگ کن اجتماعی کوشست آتا گرج ءِ، پاکستان نا پارلیمنٹ دا چرجوئی ٹی تینا پبی کڑد ءِ ادا کننگ اٹی ءِ، پاکستان نا پارلیمنٹ اٹی جینڈرمین سٹریمنگ کمیٹی نا جوڑ کننگ ملک اٹی زالبول آتے واکدار کننگ اٹ اہم ءُ گام اس جوڑ مریک۔ اوپارے کہ زالبول آتا برخلاف نازیبا لوز آتا کاریم اٹ اتنگ ءِ منپنہ۔ موسمیاتی بدلی تا ذکر ءِ کرسا اوپارےکہ دا اسہ اہم ءُ جہانی ویل اسے ، پاکستان غٹ آن زیات زہمی مروک آ ملک آتیٹی اوار ءِ، داڑتون مون تننگ کن ہرکہول آ تسلسل اٹ گام گیج برجاءِ، گرین اکانومی نا چرجوئی ٹی بنجائی حکومت نا کنڈآن بلوچستان اٹی ارب آ روپئی نا شمسی توانائی ڈٹ آتا بناءِ کننگانے ہرا موسمیاتی بدلی تون مون تننگ کن اسہ اہم ءُ گام اسے۔ اوپارے کہ کوآرڈی نیٹر ٹو پرائم منسٹر موسمیاتی بدلی رومینہ خورشید عالم ءِ دااہم ویل آ ریجنل کانفرنس اس اڈتننگ آ مبارکبادی ترسا اسپیکر اومیت ظاہرکرے کہ داکانفرنس ننا کوشست آتا دوئی کننگ اٹ کمکار جوڑمریک۔
