پاکستان، جاپان تون تین پہ تینی تعلقداری تے پین ودفنگ نا خواہندار ءِ، سردار ایاز صادق

اسلام آباد۔ 12 اگست (اے پی پی) اسپیکر قومی اسمبلی سردار ایاز صادق پارینے کہ پاکستان نا جاپان تون متکن آدوستانہ تعلقداری ءِ، پاکستان، جاپان تون تین پہ تینی تعلقداری ءِ پین ودفنگ نا خواہندار ءِ، موسمیاتی بدلی اسہ بے کچ اہم ءُ جہانی ویل اسے، غٹ ملک آتے اواری اٹ داچیلنج تون مون تروئی مریک۔ داخیال آتا درشانی ءِ او دوشنبے نادے آ جاپان نا وزیر مملکت توشیکو آبے تون اوڑدہی ٹی کرے۔ داوخت آ وزیراعظم نا کوآرڈینیٹر موسمیاتی بدلی رومینہ خورشید عالم ہم ساڑی ئسک۔ اوڑدہی ٹی پاک جاپان ہڑتوم آکنڈآتا تعلقداری ، خاص کر موسمیاتی بدلی، پارلیمانی رابطہ، واپار تون اوار ایلو امور تیا گپ وتران کننگا۔ سردار ایاز صادق پارے کہ پاکستان نا جاپان تون متکن آ دوستانہ تعلقداری ءِ، پاکستان ، جاپان تون تین پہ تینی تعلقداری تے پین ودفنگ نا خواہندار ءِ۔ اوپارے کہ موسمیاتی بدلی اسہ بے کچ اہم ءُ جہانی ویل اسے، غٹ ملک آتے اواری اٹ موسمیاتی بدلی نا چیلنج تون مون تروئی مریک۔ اوپارےکہ ہڑتوم آ ملک آتیٹی واپار تون اوار ایلو بشخ آتیٹی کمکاری ہڑتوم آ ملک آتیکن فائدہ ئی مریک، پارلیمانی سفارتکاری نا کمک اٹ ہڑتوم آ ملک آتا الس ءِ پین خڑک اتنگ مریک۔ اسپیکر قومی اسمبلی سردار ایاز صادق تعلیم تون اوار ایلو بشخ آتیٹی جاپان نا کمکاری نا ستاءِ کرے۔ جاپانی وزیر مملکت پارے کہ جاپان پاکستان تون تینا تعلقداری تے بھاز اہمیت ایتک ۔ اواسپیکر سردار ایاز صادق نا جاپان کن خیرخواہی و تعلقداری تے پین ودفنگ نا است خواہی نا درشانی آ منت واری ءِ ہرفے و پاکستان تون تینا تعلقداری و کمکاری ءِ پین ودفنگ نا است خواہی نا درشانی ءِ ہم کرے۔