سرکاری کہول آ زالبول آتیکن رکھوک  پناہ گا ہ تا جوڑ کننگ المی ءِ، ہراڑے اوفتے ہروڑنا آسراتی دوئی مرے، ڈپٹی اسپیکر بلوچستان اسمبلی غزالہ گولہ

کوئٹہ۔ 12 اگست (اے پی پی) ڈپٹی اسپیکر اسمبلی وویمن پارلیمنٹرین کاکس نا چیئرپرسن غزالہ گولہ پارینے کہ سرکاری کہول آ زالبول آتیکن ہندن ءُ رکھوک پناہ گاہ تا جوڑ کننگ المی ءِ ہراڑے اوفتے ہروڑنا آسراتی دوئی مرے۔ داخیال آتا درشانی ءِ او کوئٹہ نا اسہ ہوٹل اسے ٹی پناہ گاہ ایکٹ 2024 نا مسودہ کانود آ سلابت کن شرکت گاہ نا کنڈآن اڈ ہلوک سلابتی دیوان آن تران کرسا کرے۔ دیوان اٹی ڈپٹی اسپیکر غزالہ گولہ، صوبائی وزیر تعلیم راحیلہ درانی، وزیر ڈٹ بندی میر ظہور احمد بلیدی، صوبائی اسمبلی نا باسک شہناز عمرانی، کلثوم بلوچ، کمیشن آن اسٹیٹس آف ویمن بلوچستان نا چیئرپرسن فوزیہ شاہین، ممتاز ماہر کانود و مسکوہی چیئرمین بلوچستان پبلک سروس کمیشن کیلاش ناتھ کوہلی، ایڈووکیٹ طاہر حبیب ، ڈپٹی ڈائریکٹر سوشل ویلفیئر ناصر بلوچ، سیکشن آفیسر محمد سمیر، شرکت گاہ نا ایگزیکٹیو ڈائریکٹر فریدہ شہید، ڈائریکٹر ہمیراشیخ ، کوآرڈینیٹر ثنارضا، توقیر احمد، سیمابتول، انور بلوچ و ایلوفک بشخ ہلکر۔ بناآ شرکت گاہ نا ایگزیکٹیو ڈائریکٹر فریدہ شہید و کمیشن آن اسٹیٹس آف ویمن بلوچستان نا چیئرپرسن فوزیہ شاہین سلابتی دیوان نا گرج و مسخت آتے مون آتخار  و سلاہ ئی مسودہ کانود نا چیدہ ٹک آتیان بشخ ہلوک آتے معلومدار کریر۔ دیوان آن تران کرسا ڈپٹی اسپیکر پارے کہ بلوچستان اٹی زالبول آتا حق و رکھ انا بابت جوان کانود نا ٹہفینگ آ کاریم برجاءِ۔ ننا کوشست ءِ کہ غٹ کانود آتیٹی صنفی بریبری ءِ مون آتخنگے، داڑتون اوار اوار مہالو آن ساڑی کانود آ عملدرآمد نا گچین ءُ میکنزم اس ہم المی ءِ، دارداٹ مخلوق اٹ شعوری آگاہی تروئی مریک و داپیدوار کروئی مریک کہ ہراکانود ءِ پیدوار کننگ انگ ءِ او الس کن ءِ ولے دا ہم سخت المی ءِ کہ ہرا کانود ہرافتے کن جوڑ کننگ انگ ءِ اوفتے تون سلابت ءِ پک کننگے۔ اوپارےکہ زالبول پناہ گاہ تا جوڑ کننگ اسہ حساس ءُ باندات اسے ہنداسوب آن بنائی ریسہ غا داہیت پیدوار ءِ کہ پناہ گاک بیرہ سرکاری کہول آ ہی جوڑ مریرہ ہراڑے زالبول آتے رکھ چاگڑد اسے ٹی غٹ بنداوی آسراتی تا فراوانی ءِ پک کننگک۔ صوبائی وزیر تعلیم راحیلہ درانی پارے کہ زالبول آتا رکھ اکن سلاہ ئی مسودہ کانود جوان ءُ پیش رفت اسے، بلوچستان وومن پروٹیکشن ایکٹ 2024 و مسن تا برام ءِ 18 سال ودفنگ نا بل ءِ منظور کننگ نا کوشست کننگ اُن۔ نن دا بل ءِ پاس کننگ کن و اوڑکن آراوبیز پک کننگ کن غٹ اسمبلی نا باسک آتون اواری اٹ جہد کین۔ دا بل آتا بارواٹی آگاہی مہم ہم المی ءِ۔ وزیر ڈٹ بندی میر ظہور احمد بلیدی پارے کہ بحیثیت پارلیمنٹرین ننا زمواری ءِ کہ نن دا ہڑتوم آ خاص وڑاٹ زالبول آتا رکھ انا بل انا مخ تفی ءِ کین و قائمہ کمیٹی ءِ قائل کننگ نا حکمت عملی اس جوڑ کین۔ فوزیہ شاہین پارے کہ زالبول آتا رکھ انا بل انا محکمہ کانود نا کنڈآن جاچ ءِ ہلنگک و اودے صوبائی اسمبلی آن پاس کننگ نا گرج ءِ ، ننے خوشی ءِ کہ ای اے ایم ریسٹرینٹ کن صوبائی اسمبلی نا انتظار ءِ۔ اونا پاننگ ئس کہ نن بھاز زیات لابنگ ءِ برجاتخان، شرکت گاہ بلوچستان ویمن پروٹیکشن بل 2024 کن اہم کڑد ادا کرے و کم عمری نا برام نا بل 2024 کن ہم لابنگ نا سخت گرج ءِ  تانکہ بلوچستان اسمبلی آن پاس مرے۔ ممبر صوبائی اسمبلی کلثوم بلوچ پارےکہ ننے واقعی داکانود ءِ نافذ کننگ نا گرج ءِ انتئے کہ جاگیردارانہ راج ننے زالبول آتے پدی تخا و بیدادی نا پرچار کرے۔