وزیراعظم شہباز شریف نا خصوصی پارت آ ملک انا 77 می آجوئی دے انا وخت آ ‘‘عزم استحکام’’ نا سرحال آن خصوصی ڈاک ٹکٹ اس جاری

اسلام آباد۔ 10 اگست (اے پی پی) وزیراعظم شہباز شریف نا خصوصی پارت آ ملک انا 77 می آجوئی دے انا وخت آ‘‘عزم استحکام ’’ نا سرحال آن خصوصی ڈاک ٹکٹ اس جاری کننگا۔ ڈاک ٹکٹ آ پاکستان نا جیولین تھرو ر ارشد ندیم نا عکس ءِ خلسا اودے خراج تحسین پیش کننگانے۔ ارشد ندیم پیرس اولمپکس اٹی 92.97 میٹر فاصلہ غا نیزہ ءِ خسسا پوسکن اولمپک ریکارڈ اس جوڑ کرسا گولڈ میڈل دوئی کرے و ورنا چین اکن اسہ درورا س جوڑ مسنے۔ ڈاک ٹکٹ ءِ عزم استحکام نا سرحال تننگانے ہرا ملک انا شونداری و سوگوی نا عزم انا پاش آن پاش شاہدی ءِ۔ ڈاک ٹکٹ اٹی مینار پاکستان نا عکس ءِ اوار کرسا پاکستان نا آجوئی نا جہد و اونا علامتی اہمیت ءِ ہم تالان کننگانے۔ حکومت پاکستان نا کنڈآن یوم آجوئی نا وخت آ جاری کروک ڈاک ٹکٹ بروک آ چین تے پاکستان نا آجوئی نا جہد، قربانی و حکومت پاکستان نا ملکی سوگوی کن جہد و عزم آن معلومدار کیک۔