محسن نقوی نا بنجائی دارالحکومت نا تھانہ غاتے سمارٹ پولیس اسٹیشن نا وڑآ اپ گریڈ کننگ ناپرمان

اسلام آباد۔ 10 اگست (اے پی پی) بنجائی وزیرداخلہ محسن نقوی بنجائی دارالحکومت نا تھانہ غاتے سمارٹ پولیس اسٹیشن نا وڑآ اپ گریڈ کننگ نا پرمان کرسا پارینے کہ روایتی تھانہ خوف انا نشانی جوڑ مسنے، سُوالی تھانہ غابننگ آن مست کیہی وار سجفک ۔ وزارت داخلہ نا کنڈآن ہفتہ نادے آ جاری اعلامیہ نا رداٹ بنجائی وزیر داخلہ محسن نقوی نا کماشی ٹی اسلام آباد نا تھانہ غاتا اپ گریڈیشن آ پیش رفت نا بابت جاچ دیوان اس اڈہلک۔ داوخت آ وزیر داخلہ بنجائی دارالحکومت نا تھانہ غاتے سمارٹ پولیس اسٹیشن نا وڑآ اپ گریڈ کننگ نا پرمان کرسا پارینے کہ روایتی تھانہ غاک خوف انا نشانی جوڑ مسنو ، سُوالی تھانہ غا بننگ آن مست کیہی وار سجفک۔ محسن نقوی پارے کہ تینٹ ہم تھانہ غاتا دورہ ءِ کرینٹ ، ہراحالیت زار ءِ خنانٹ اودے بیان کننگ مفک۔ اوپارے کہ اسلام آباد پاکستان نا چہرہ ءِ، اسلام آباد ءِ جہانی آب انا شاراس جوڑ کننگ کن بلاتاخیر سمارٹ پولیسنگ نا کنڈآہنوئی ءِ، سمارٹ پولیس اسٹیشن کن ہرممکن وسیلہ ایتنہ۔ وزیرداخلہ پارے کہ خوش اخلاق و تعلیم یافتہ پولیس آفیسر آتے سمارٹ پولیس اسٹیشن اٹ تعینات کننگک، ریسہ وار پروگرام نا رداٹ تھانہ غاتے اپ گریڈ کرسا سمارٹ پولیس اسٹیشن اٹی بدل کننگک۔ وزیرداخلہ محسن نقوی پلان آ زوت عملدرآمد نا پارت کرسا پارے کہ اپ گریڈیشن کن کم خڑچ اتون آب اٹ ڈیزین تیار کننگے۔ وزیرداخلہ محسن نقوی ایلو ماڑی تیٹی جوڑ تھانہ غاتیکن ڈغار تا پیدواری نا ہم پارت کرے۔ اوپارے کہ اسلام آباد پولیس اٹی بھرتی کن میرٹ آ ہچ ءُ سمجھوتہ اس مفک۔ ہرحال اٹ فٹ، تعلیم یافتہ و میرٹ آ پورو سلوک آ ورناتے بھرتی کننگک۔ وزیرداخلہ پارے کہ پولیس نا سُوالی تتون رویہ ٹی ہم مثبت بدلی المی ءِ۔ دیوان اٹی بنجائی سیکرٹری داخلہ خرم علی آغا، چیئرمین سی ڈی اے محمد علی رندھاوا، ڈی آئی جی آپریشنز و بڑزکو کمامدارآک ہم بشخ ہلکر۔