اسکول نا چناتیا جلہو اسرائیل نا پاش آن پاش جارحیت ءِ، جہانی برادری اسرائیلی سفاکیت ءِ توننگ کن عملی گام گیج کے، وزیر اعظم محمد شہباز شریف

اسلام آباد۔ 10 اگست (اے پی پی) وزیراعظم محمد شہباز شریف پارینے کہ اسرائیل تینا سفاکانہ کارروائی تا غٹ حد آتیان گدرینگا، اسکول نا چناتیا جلہو پاش آن پاش جارحیت اسے، داوڑنا بربریت نا درور تاریخ اٹی ملیپک، جہانی برادری بشمول اقوام متحدہ اسرائیل نا سفاکیت ءِ توننگ کن عملی گام گیج کے۔ وزیراعظم آفس میڈیا ونگ انا کنڈآن ہفتہ نادے آ جاری بیان اٹی وزیراعظم محمد شہباز شریف غزہ، فلسطین نا اسکول آاسرائیلی جلہو نا ترندی اٹ مذمت ءِ کرے۔ وزیراعظم جلہو اٹی شہید مروک آ تا درجہ غاتا بڑزی کن دعا و اوفتا خاہوت آتون ہڑزخواہی نا درشانی ءِ ہم کرے۔ محمد شہبا زشریف پارے کہ اسرائیل تینا سفاکانہ کارروائی تا غٹ حدآتیان گدرینگا، اسکول نا چناتیا جلہو پاش آن پاش جارحیت اسے، داوڑنا بربریت نا درور تاریخ اٹی ملیپک ، جہانی برادری بشمول اقوام متحدہ اسرائیل نا سفاکیت ءِ توننگ کن عملی گام گیج کے، وزیراعظم پارے کہ نن اسہ وار ولدا تینا خواست ءِ دُوارہ کینہ کہ فلسطینی تا نسل کشی و جنگی ڈوہ تیا اسرائیلی سرکڑدہ و سیکورٹی فورس آتے انصاف نا مون آ سلفنگے، اسرائیل ءِ اونا ظالمانہ کارروائی تا کڑی سزاتننگے، اسرائیل نا برخلاف جہانی عدالت انصاف نا فیصلہ آ عملدرآمد کرفنگے۔ وزیراعظم محمد شہباز شریف پارے کہ پاکستان ہرپڑآ تینا فلسطینی ایڑھ و ایلم تا اخلاقی و سفارتی مخ تفی ءِ برجاتخک۔