اسلام آباد۔ 10 اگست (اے پی پی) اسپیکر قومی اسمبلی سردار ایاز صادق اولیکو دستور سازا سمبلی نا 77 می سال دے انا وخت آ خصوصی کلہو اٹی پارے کہ 10 اگست 1947 آ دستورساز اسمبلی نا اولیکو دیوان کراچی ٹی اڈ ہلک۔ دستور سازا سمبلی نا قیام قائدین تا السی و جمہوری سوچ انا درشانی ئس۔ پارلیمان نا بالادستی و آئین وکانود نا حکمرانی ٹی ملک انا شونداری نا راز اودیم ءِ۔ قومی اسمبلی سیکرٹریٹ ڈائریکٹوریٹ جنرل آف میڈیا نا کنڈآن ہفتہ نا دے آ جاری اعلامیہ نا رداٹ سردار ایاز صادق پارے کہ پارلیمان 25 کروڑ الس نا نمائندگی ءِ کیک، الس نا راجی آسودہی اولیت ءِ، پارلیمان سوگو مریک تو جمہوریت سوگو مریک۔ اسپیکر قومی اسمبلی مستی پارے کہ پارلیمان نا بالادستی و آئین وکانود نا حکمرانی ٹی ملک انا شونداری نا راز اودیم ءِ۔ پارلیمان نا کمک اٹ ہی ملک ءِ مون تروک ویل آتے ایسر کننگ مریک، پارلیمانی نظام نا چرجوئی و جمہوریت نا سوگوی ملکی بقاء و سلامتی کن المی ءِ۔ سردار ایاز صادق پارے کہ الس و پارلیمان اٹ تعلق ءِ سوگو کننگ کن پارلیمان اسکان السی رسینگ ءِ ممکن کرے، ورناتا اسہ بھلو کچ اس قومی اسمبلی ٹی انٹرشپ کننگ ءُ، شفافیت ءِ برقرارتخنگ کن قومی اسمبلی تون گنڈوک السی معلومداری اسکان رسینگ ءِ پک کرے۔ اوپارے کہ قومی اسمبلی نا کاریم نا کچ ءِ ودفنگ و کفایت شعاری ءِ پک کننگ کن پوسکن آ ٹیکنالوجی ءِ درستی راستی کرفنگ اُن۔ ڈپٹی اسپیکر سید غلام مصطفیٰ شاہ داوخت آپارے کہ پارلیمان نا سوگوی و ملک اٹی جمہوریت نا تسلسل ملک انا شونداری و شونہالی کن المی ءِ، پارلیمان نا کمک اٹ گچین کانود سازی کرسا نن ملک ءِ شونداری نا کنڈآ دننگ کینہ۔
