اسلام آباد۔ 10 اگست (اے پی پی) اسپیکر قومی اسمبلی سردار ایاز صادق ضلع خیبر وادی تیرہ ٹی سیکورٹی فورس و دہشت گرد آتا نیام اٹ اسہ ایلو آ سم کاری ٹی مسہ ورناتا نہادی جون تا نسخان آ ڈکھیائی وا ست ہسونی نا درشانی ءِ کرسا پارینے کہ مچ آقوم دہشت گردی نا برخلاف جنگ اٹی سیکورٹی فورس آتون ہم کوپہ سلوک ءُ، دہشت گرد امن وانسانیت نا دشمن ءُ۔ قومی اسمبلی سیکرٹریٹ ڈائریکٹوریٹ جنرل آف میڈیا نا کنڈآن ہفتہ نا دے آ جاری تینا بیان اٹی اسپیکر قومی اسمبلی شہید سیکورٹی کارندہ حوالدار انعام گل، سپاہی محمد عمران و سپاہی الطاف خان ءِ خراج عقیدت پیش کرے و شہید آتا خاہوت آتون ہڑزخواہی وہمدردی نا درشانی ءِ ہم کرے۔ اوپارے کہ شہید ورناتا دتر زیان مفک، مچ آ قوم دہشت گردی نا برخلاف جنگ اٹی سیکورٹی فورس آتون ہم کوپہ سلوک ءُ۔ دہشت گرد آک امن و انسانیت نا دشمن ءُ۔ اسپیکر قومی اسمبلی پارے کہ شرپسند زموار آک دہشت گردی نا چٹفنگ کن قوم انا بدل مفروک عزم ءِ متززل کننگ کپسہ۔ اودعاکرے کہ اللہ تعالیٰ شہید آتا درجہ غاتے بڑز و خاہوت آتےصبر وجمیل عطاکے۔ ڈپٹی اسپیکر سید میر غلام مصطفیٰ شاہ ہم وادی تیرہ ٹی دہشت گرد آتا برخلاف اسہ ایلو آ سم کاری ٹی سیکورٹی کارندہ غاتا جونی نسخان آ است ہسونی نا درشانی ءِ کرے و شہید حوالدار انعام گل، سپاہی محمد عمران و سپاہی الطاف خانءِ دہشت گرد آتے جہنم واصل کننگ ا خراج عقیدت ہم پیش کرے۔ ڈپٹی اسپیکر شہید آتا خاہوت آتون ہمدردی و ہڑزخواہی نا درشانی ءِ کرسا پارے کہ دہشت گرد آک تینا ناپاک مسخت آتیٹی اسل سرسہب مفسہ، مچ آ قوم دہشت گردی نا چٹفنگ کن سیکورٹی فورس آتون سلوک ءُ۔ ڈپٹی اسپیکر سید میر غلام مصطفیٰ شاہ اللہ تعالیٰ آن شہید آتا درجہ غاتا بڑزی و خاہوت کن صبر وجمیل نا دعاہم کرے۔
