کراچی۔ 10 اگست (اے پی پی) بنجائی وزیر واپار جام کمال خان پارینے کہ فوڈ اے جی ایکسپو 2024 اٹی 75 ملک آتا سد آ ڈل و کمپنی تا بشخ ہلنگ جہانی دنیا نا پاکستان آ پت انا درشانی ءِ ، نمائش اٹی پاکستان نا ہم 350 کمپنی تا نمائندگی ءِ۔ ملک انا چنکا شار تا کشت وکشار تون وابستہ بندغ آتا بشخ ہلنگ و خاص کر بلوچستان آن زالبول آتا بشخ ہلنگ ستاکڑزک۔ داخیال آتا درشانی ءِ او ایکسپو سینٹر اٹی اڈ ہلوک فوڈ اے جی ایکسپو 2024 نا ارٹ میکو دے پریس کانفرنس آن تران کرساکرے۔ اوپارے کہ پاکستان نا تاریخ اٹ واپار نا بابت داخہ در سرسہب پروگرام متنے و نئے واپاری پروگرام اٹی داخہ در بھلو کچ اسے ٹی ڈل آک بسنو۔ اوپارے کہ ایکسپو ٹی بشخ ہلوک آتیٹی یورپی یونین، افریقی ملک، چین، ملائیشیا ، انڈونیشیا ، ویت نام تون اوار ایلو ملک آک اوار ءُ۔ اوپارے کہ بنائی دود اٹی وزیراعظم شہباز شریف تون اوار ترکیہ نا وزیر ہم ساڑی ئس۔ بنجائی وزیرپارے کہ بیرہ اسہ ڈیہہ اسے آن مخلوق بتنے بلکن 75 ملک آتیان 800 ڈل بسنو، داٹی کمپنی، مالک و پوریاگر آک اوار ءُ۔ اوپارے کہ ملک انا ایلو شارتیٹی ہم نمائش اڈایتنہ۔ جام کمال خان مستی پارے کہ داکشت وکشار نا بشخ، بزغر و کشت وکشار تون وابستہ کاروباری بندغ و ہر ہمو بشخ اکن اہم ءِ ہرا کشت وکشار نا بشخ اتون وابستہ ءِ۔ بنجائی وزیرپارے کہ دا ایکسپو آن کشت وکشار گچین مریک۔ کشاری بشخ انا ایکسپورٹ اٹی ودکی مریک تو اونا مثبت اثر بزغرآتیا ہم مرتب مریک و ملکی زرگزران ہم گچین مریک۔ اوپارے کہ دا سرسہب نمائش اٹی وزارت واپار ٹڈاپ و چندی ملک آتیٹی تعینات ٹڈاپ نا آفیسر آتا خواری اوار ءِ۔ حکومت میرٹ آ ٹریڈ آفیسرز تعینات کرینے و اوفتا کارکڑد نا جاچ ءِ ہم ہلنگک۔ بنجائی وزیر پارےکہ دنیا ننتون واپار کننگ اٹی است خواہی تخک۔ اوپارے کہ دا حقیقت اسے کہ ننے چیلنج و ویل مون تروک ءِ، ولے اوکان پد ہم زرگزران اٹی سوگوی بسنے و کبینی  کم مسنے۔ اوپارے کہ فوڈ و کشت وکشار اٹی بھاز وارخواہی ساڑی  ءِ و ملک انا ایلو بشخ آتا بھلو گروپ آک ہم داسہ دابشخ انا کنڈآ بننگ خوارہ۔ ہراڑآن بزغرءِ ہم فائدہ مریک و دابشخ اتون گنڈوک ایکسپورٹس ہم ودک۔ اوپارے کہ انرجی نا پنجر ءِ سہی کننگ خوانہ، بزنس کمیونٹی نا ویل آتے ایسر کننگ خوانہ، و ایف بی آر اٹی اصلاحات ہم ننا ایجنڈاغاٹی ءِ۔ برنج نا ایکسپورٹ نا بابت سوج انا ورندی ٹی اوپار ے کہ بھارت نا گیپ آن فائدہ ہرفنگ ہم توسرسہبی ءِ ولے دا خلاغان مست ہم پاکستانی پوریاگر جہانی مارکیٹ اٹی ساڑی ئسر۔ اوپارے کہ ایکسپورٹ آتیٹی ودکی و ملکی زرگزران نا گچینی کن مخصوص بشخ آتیان بدس ایلو بشخ آتیا ہم چکار کروئی مریک۔ اوپارے کہ حکومت کاروبار ءِ آسان کننگ کن گام گیج کننگ ءِ تانکہ ہر بشخ اٹی کاروباری مخلوق نا مون تروک ویل آتے ایسر کننگے۔

متعلقہ مضامینمصنف کی طرف سے مزید