کراچی۔ 09 اگست (اے پی پی) مزن وزیر محمد شہباز شریف پارینے کہ پاکستان اٹ کشاری برآمد آتیٹی ودکی نا بھلو وارخواہی اس ساڑی ءِ، پوسکن آ ٹیکنالوجی و پٹ وپول و شونداری نا کمک اٹ برآمد آتیٹی ودکی مننگ کیک، حکومت پاکستان کشارگر و برآمد کروک آتے آسراتی فراوان کننگ کن سنبرینگوک ءِ، بنجا و صوبہ غاتے اواری اٹ کشاری بشخ انا شونداری آ چکار کروئی ءِ، بروک آ سال اکن کشاری برآمد آتا ہدف 7 ارب ڈالر بایدے مرے، ہر سال اسہ ہزار گریجویٹ آتے کشاری تربیت کن چین آ گدریفنگک، ارشد ندیم اولمپکس اٹی طلائی تمغہ ءِ کٹسا ملک انا کاٹم ءِ گمر اٹ بڑزکرے، وطن آ پدی بننگ آ اودے جم و جوش اٹ بخیرکننگک۔ داخیال آتا درشانی ءِ او جمعہ نادے آ داڑے ارٹ میکو جہانی فوڈ اینڈ ایگریکلچر نمائش نابنائی دود آن تران کرساکرے۔ دود اٹی گورنر سندھ کامران خان ٹیسوری، وزیراعلیٰ سندھ سید مراد علی شاہ ، بنجائی وزیر واپار جام کمال خان ، بنجائی وزیر خزانہ محمد اورنگزیب، بنجائی وزیر صنعت و پیدوار رانا تنویرحسین ، بنجائی وزیرمواصلات عبدالعلیم خان ، بنجائی وزیر حوالکاری و شینکاری عطاء اللہ تارڑ، بنجائی وزیر جہاز رانی بندرگاہ قیصر احمد شیخ و بنجائی وزیر تعلیم و کسبی تربیت خالد مقبول صدیقی ئسک ہم ساڑی ئسر۔ وزیراعظم دود آن تران نا بناٹی ارشد ندیم ءِ مبارکبادی ترسا پارے کہ نن تینا ہیرو ارشد ندیم ءِ اولمپکس اٹی گولڈ میڈل ءِ کٹنگ آ مبارکبادی ایتنہ ، 40 سال آن پد پاکستان طلائی تمغہ ءِ دوئی کرینے، داننکن اسہ بھا زاہم ءُ لمحہ و بھلو اعزاز اسے، ارشد ندیم طلائی تمغہ ءِ دوئی کرسا پاکستان کن بھلو تاریخی کارنامہ اس سرتسنے و ملک انا کاٹم ءِ گمر اٹ بڑزکرینے۔ ننے داسہ کرکٹ و ہاکی تون اوار ایلوگوازی تیٹی ہم سرسہبی دوئی کروئی ءِ، ارشد ندیم نا سرسہبی آاللہ نا شکر ءِ ادا کینہ۔ اونا سرسہبی آن ننے اسہ اومیت و حوصلہ اس رسینگانے۔ زند چیلنج آتیان پبی ءِ ولے اگہ نن ہمت کین تو ہچ اس ناممکن اف۔ ارشد ندیم نا پاکستان آ بننگ آ شاندا ر بیابخیری کننگک۔ وزیراعظم تینا تران اٹی پارے کہ پاکستان نا کشاری مصنوعات آتا برآمدآک 3 ارب ڈالر اسکان سرمسنو، بروک آ سال اکن کشاری برآمد آتا ہدف 7 ارب ڈالر بایدے مرے، پاکستان اٹی بھاز لائخی ارے ، برآمد آتا ودکی آ برآمد کروک و تعلقدار کمامدارآتے مبارکبادی ایتیوہ، ننے تینا فی ایکڑ پیدوار اٹی ودکی ءِ پک کروئی ءِ و داڑکن پوسکن آ ٹیکنالوجی و وڑوڈول آتے اختیار کننگ ناگرج ءِ، بنجاو صوبہ غاتے اواری اٹ کشاری بشخ انا شونداری آ چکار کروئی ءِ، کشاری چاہندار آتا خذمت آتیان کشاری پیدوار اٹی ودکی کننگ مریک، ریسرچ و ڈویلپمنٹ نا کنڈآ چکار ءِ ودفنگ کن کاریم کروئی مریک، پوسکن آ ٹیکنالوجی و پٹ وپول و شونداری نا کمک اٹ برآمد آتیٹی ودکی ممکن ءِ ، پاکستان اٹ کشاری برآمد آتیٹی ودکی نا بھلو وارخواہی اس ساڑی ءِ۔ ننے کشاری مصنوعات آتا ویلیو ایڈیشن نا کنڈآ ہنوئی مریک۔ وزیراعظم پارے کہ چنکا ونیامی درجہ نا صنعت آتیکن خلقی علاقہ غاتیٹی وام تا فراوانی ءِ ودفنگ نا گرج ءِ، ننے خلقی علاقہ غاک شون ہلیرہ تو اوڑآن ملک شون ہلیک۔ پوسکن آ ٹیکنالوجی پٹ وپول و شونداری نا کمک اٹ برآمد آتیٹی ودکی ممکن ءِ ، چین کشاری بشخ اٹی پوسکن آ ٹیکنالوجی ءِ کاریم اٹ اتسا شونداری نا مزل آتے طے کرینے۔ حکومت پاکستان برآمد کروک و کشار گرآتے ہروڑنا کمک فراوان کننگ کن تیار ءِ ، خلقی علاقہ غاتیٹی بزغر آتے وام تا فراوانی آن پیدوار اٹی ودکی مریک۔ وزیراعظم پارے کہ دورہ ءِ چین اٹی ای پوسکن آ مرکز نا دورہ ءِ کریٹ، ہراڑے پوسکن آ ٹیکنالوجی نا کمک اٹ ہی شونداری ءِ پک کننگانے۔ وزیراعظم پارے کہ ساڑی حکومت کشاری بشخ انا شونداری نا و برآمدآتیٹی ودکی کن پبی گام گیج کننگ اٹی ءِ، بلوچستان اٹی بجلی آ چلینگوک آ 28 ہزار ٹیوب ویل آتے شمسی توانائی آ گدریفنگ نا منظوری ءِ تننگانے، بنجائی حکومت اسہ ہزار طالب علم آتے پوسکن آکشاری تربیت کن چین آ گدریفک، حکومت پاکستان کشارگر و برامد کروک آتے آسراتی فراوان کننگ کن سنبرینگوک ءِ ، افزائش حیوانات نا بشخ اٹی ہم چین وپاکستان نا نیام اٹ کمکاری نا بھلو وارخواہی اس ساڑی ءِ۔ وزیراعظم پارے کہ پاکستان نا سعودی عرب، یواےای، قطر، کویت و ترکیہ تون یکتا تعلقداری ءِ، خلیجی ملک آتون نئے بیرہ برآمد ات معدنیات و ایلو بشخ آتیٹی کمکاری ءِ مون آدننگ کینہ و اسیجائی کشاری ڈٹ آتابناءِ کننگ مریک ، اگہ نن خواری ءِ تینا شعار کین تو ہر مشکل آسان مننگ کیک۔ اوکان پد وزیراعظم ارٹ میکو جہانی فوڈ اینڈ ایگریکلچر نمائش نا بناءِ کرے و چندی اسٹال آتا معائنہ ءِ کرے، وزیراعظم ءِ سٹال آتا بارواٹی حوال تننگا و اودنیا نا چندی مملک آتیان بروک آ مندوبین آتون اوڑدہی کرے و اوفتے تون گپ وتران ہم کرے۔ مزن وزیر کشاری بشخ اٹی گچین کارکڑد آ برآمد کروک آتے ایوارڈ زہم تس۔ دود آن بنجائی وزیر واپار جام کمال خان و ٹریڈ ڈویلپمنٹ اتھارٹی آف چیئرمین نا چیف ایگزیکٹیو زبیر موتی والا ئسک ہم تران کریر۔
