وزیراعظم ارشدندیم نا پیرس اولمپکس اٹی پرفارمنس ءِ براہ راست ہرا، طلائی تمغہ ءِ کٹنگ آ مچ آ قوم  ءِ مبارکباد

اسلام آباد۔ 09 اگست (اے پی پی) وزیراعظم محمد شہباز شریف نن نیمہ اسکان پاکستانی جیولن تھرو ایتھلیٹ، ارشد ندیم نا پیرس اولمپکس اٹی پرفارمنس ءِ براہ راست ہرا و مسہ دہائی آن پد اولمپکس مقابلہ غاتیٹی طلائی تمغہ ءِ کٹنگ آ مچ آ قوم ءِ مبارکبا دی تسنے۔ جمعہ نادے آ وزیراعظم آفس نا میڈیا ونگ آن جاری بیان نا رداٹ وزیراعظم ارشد ندیم نا شاندار سرسہبی و جیولن تھرو ٹی پوسکن ءُ اولمپکس ریکارڈ جوڑ کننگ آ پاکستان زندہ باد نا نعرہ ءِ خلک۔ وزیراعظم مسہ دہائی تیان پد اولمپکس مقابلہ غاتیٹی تمغہ ءِ کٹنگ آ مچ آ قوم ءِ مبارکبادی تس۔ وزیراعظم پارے کہ اللہ نا فضل وکرم اٹ ہرا فصل ءِ بطور خادم اعلیٰ پنجاب یوتھ فیسٹیول نا کمک اٹ دسے، اونا شاندار بھرمک مچ آ دنیا ٹی پاکستان نا پن ءِ بڑز کننگ ءُ ، کنکن دا گمرنا ہیت اسے کہ ارشد ندیم کون آ لائخ ورناتے دریافت کننگ کن اللہ رب العزت کنکون آ ناچیز ءِ وسیلہ جوڑ کرے۔ داکان مست وزیراعظم ارشد ندیم ءِ نئے بیرہ خیسن نا تمغہ ءِ کٹنگ بلکن اولمپکس نا پوسکن ءُ جہانی ریکارڈ اس ہم جوڑ کننگ آ مبارکبادی ترساپارے کہ مچ آ قوم ءِ ارشد ندیم آ گمر ءِ۔ اوپارےکہ ارشد ندیم مچ آ پاکستانی قوم ءِ بھاز زیباءُ ٹیکی اس تسنے۔