ترکیہ تون واپاری تعلقداری تے مون آ دننگ نا خواہندار اُن، ہڑتوم آکنڈآتا واپاری کچ 5 ارب ڈالر سالانہ اسکان دننگ کن اولیتی بنداوتیا گام گیج کننگ اُن، وزیراعظم شہباز شریف

اسلام آباد۔ 09 اگست (اے پی پی) وزیراعظم محمد شہباز شریف پارینے کہ پاکستان و ترکیہ نا نیام اٹ واپاری تعلقداری تے مون آدننگ نا خواہندار اُن، ہڑتوم آ کنڈآتا واپاری کچ 5 ارب ڈالرسالانہ اسکان دننگ کن اولیتی بنداو تیا گام گیج کننگ اُن۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ  او ترک وزیرواپار و کسٹمز ڈاکٹر عمر بولات نا کماشی ٹی ترک زرکارآتا بڑزکو کہول ڈل اتون گپ وتران کرسا کرے ہرا جمعہ نادے آ داڑے اوڑتون اوڑدہی کریر۔ اوڑدہی ٹی بنجائی وزیر خواجہ محمد آصف، محمد اورنگزیب، عبدالعلیم خان، سردار اویس لغاری، پاکستان نا ترکیہ ٹی سفیر ڈاکٹر یوسف جنید ئسک ہم ساڑی ئسر۔ ترک ڈل اٹی ترکیہ نا نائب وزیر واپار مصطفیٰ تزجو، TOBBنا صدر  رفعت حصار جکلیو علو، DEIKنا صدر نیل اولپک، ترکیہ کنٹریکٹر ایسوسی ایشن نا صدر ایردال ایران، MUSIADنا صدر محمود عصمالی، TUMSIADنا صدر یشار دوعان، ASKONنا صدر اورحان آئیدن، ترکیہ ایکسپورٹر اسمبلی نا صدر اتیلہ یرلیکایا و ALBAYRAKہولڈنگ نا چیئرمین احمت البیراک تون وار اوار پاکستان اٹ ترکیہ نا سفیر مہمت پاچاجی ئسک اوار ئسر۔ وزیر اعظم ترک زرکارآتا ڈل انا دورہ ءِ پاکستان نا ستاءِ کرے و پارےکہ ترکیہ و پاکستان نا الس نا نیام اٹ بے مٹ ایلمی تعلقداری ءِ، ہرا پیڑی تیا تالان ءِ۔ ترکیہ وپاکستان اسہ قوم اِر اریاست ءُ۔ وزیراعظم پارے کہ حکومت پاکستان ہڑتوم آملک آتا نیام اٹ واپاری تعلقداری تا مون آ دننگ نا خواہندار ءِ۔ اوپارے کہ ترک صدر رجب طیب اردوان تون پاکستان و ترکیہ نا نیام اٹ واپاری کچ ءِ ساڑی آ کچ آن ودفسا سالانہ 5 ارب ڈالر آ سرکننگ آ امنائی مس۔ واپاری کچ ءِ سالانہ 5 ارب ڈالر آ سرکننگ کن اولیتی بنداوتیا گام گیج کننگ اُن۔ وزیراعظم تعلقدار کمامدار آتے ترکیہ نا زرکار آتے پاکستان اٹ زرکاری کن ہروڑنا آسراتی فراوان کننگ نا پارت کرے۔ وزیراعظم ترکیہ نا صدرءِ زوت پاکستان نا دورہ ءِ کننگ نا سلہ نا درشانی ءِ کرسا پارے کہ پاکستانی الس ترکیہ نا صدر رجب طیب ایردوان نا پاکستان نا دورہ نا چاری ءِ۔ ترکیہ نا زرکارڈل انا دورہ، پاکستان اٹ ترکیہ نا زرکاری ٹی ودکی کن ستاکڑزوک پک مریک۔ اوڑدہی ٹی ترکیہ نا وزیر واپار پارے کہ 54 ترک زرکارکمپنی تا پاکستان اٹ زرکاری نا ساڑی آ کچ 3.5 ارب ڈالر ءِ۔ ترکیہ نا زرکارآتا پاکستان اٹ سیاسی و زرگزرانی سوگوی آ است جمی نا درشانی ءِ کرے۔ ترک ڈل 2023 نا زمی جمب اٹی پاکستان نا کنڈآن زہمی ترک ایڑھ ایلم تا پبی امداد آ وزیراعظم نا منت واری ءِ ہرفے۔