اسلام آباد۔8اگست (اے پی پی): بیپاری ءِ بنجاہی وزیر جام کمال خان ءَ گشتگ کہ حب ءَ ہوار سرجمیں ضلع ءِ جیڑہ ءُ جنجالانی گیشءُ گیواری ءِ ھاترءَ جوڑ کتگیں رھبندانی سرءَ کار کنگ بیت۔ اے ھیالانی درشانی آئیءَ بلوچستا ن ءِ سروزیر ءِ صنعت ءُ حرفتءِ صلہ کار میرعلی حسن زہری ءِ ہمراہ کومل سٹی ءَ گوں میڈیاءَ گپ ءُتران کنان ءَ کتگ۔ بیپاری ءِ بنجاہی وزیر جام کمال خان کومل سٹی حب ءَ صنعتءُ حرفتءِ صلہ کار میر علی حسن زہری ءِ لوگءَ شتگ۔ میر علی حسن زہری ءَ جام کمال خانءَ را دودءُ ربیدگی اجرک داتگ، جام گروپ ءِ کونسلر ءُ ایندگہ رایشون ہم اے موہءَ ساڑی بوتگ اَنت۔ جام کمال خان ءُمیر حسن زہری ءَ گندءُ نندءِ تہا ملکی ءُ حاس حب ءِ بلدیاتی سیاستءِ حوالگءَ ھیالءُ لیکہ ءِ درشانی کتگ۔ دوئیں راھشوناں حب ءِ دمگی جیڑہ ءُ جنجال ءُآیانی گیشءُ گیواری ءِ ھاترءَ شور ءُ تران کتگ۔ بنجاہی وزیرءَ گشتگ کہ بازیں وہداں چہ ڈلگ چار کتگیں دمگ حب ءَ را نوں مٹ بوھگ لوٹ ایت۔ آئی ءَ گشتگ کہ نیشنل پارٹی ءِ گوما ہم گپءُتران بوہگءَ اَنت مارا اُمیت ایں کہ آ ہم مئے گوما ہمراہ داری کنت، بلدیات ءِ عہدگانی ھاترءَ مہ زِد نہ کتگ درستانی کہ پیسلہ بیت مارا قبول بیت۔ میرعلی حسن زہری ءَ گشتگ کہ رجب علی رندءِ گوما ہم گپءُتران بوہگءَ ایں، رجب علی رند یک سرپدی سیاست دان اِت ، اُمیت ایں کہ آ ہم ایچ وڑیں ھڑوکی نہ کنت۔ اے وہدءَ حب ءِ دیمروئی ءِ ھاترءَ مئے تپاک بوہگ المی اِنت۔ آئی ءَ گشتگ کہ حب ءَ میگاپروجیکٹس ءِ حوالگءَ گیش کوشست کنگ بوہگءَ ایں، زوت اے حوالگءَ منءُ میرعلی حسن بلوچستان ءِ سروزیرءِ گوما ہم گندءُ نند کناں۔
