اسلام آباد۔ 07 اگست (اے پی پی) وزیراعظم محمد شہباز شریف پارینے کہ بشامی آ سیزن اٹی مچ آملک اٹی دہ کروڑ آن زیات نیال خلنگک، درخت آتیان آب وہوا ساف، موسمیاتی بدلی نا اثرآتیٹی کمتی و قدرتی حسن اٹ ودکی مریک۔ قدرت پاکستان ءِ بے پناہ نعمت تسنے، ننے دے ونن خواری اٹ قدرت نا تروک آ نعمت آتیان فائدہ ہرفوئی ءِ۔ وزیراعظم چارشنبے نادے آ داڑے وزیراعظم ہاؤس نا سوزہ زاراٹی نیال اس خلسا شجرکاری مہم نا بناءِ کرے۔ داوخت آ وزیراعظم ءِ شجرکاری مہم نا بابت حوال تننگا۔ وزیراعظم ءِ پاننگا کہ جون 2024 اٹی اِرا ارب 20 کروڑ نیال خلنگانے۔ داوخت آ گپ وتران کرسا وزیراعظم شہباز شریف پارے کہ اینو نن بشام شجرکاری مہم نا بناءِ کننگ اُن، دا شجرکاری ٹی مچ آملک اٹی دہ کروڑ نیال خلنگک، داڑآن نئے بیرہ پاکستان زیبا مریک بلکن موسمیاتی بدلی ہراپاکستان ءِ 2022 اٹی بھاز بے وڑ شست کریسس اودے ہم کنٹرول کننگ اٹ کمک رسینگک، فضائی کچٹی ٹی کمتی واقع مریک و قدرتی حسن اٹ ودکی مریک۔ وزیراعظم پارے کہ بشام نا دا موسم است آتے خوش کروک آموسم ءِ ہراٹی ہرکنڈآ بشخندہ تالان مریک، برسات آن باسنی نا شدت اٹی کمتی واقع مریک۔ وزیراعظم پارے کہ اللہ تعالیٰ پاکستان ءِ بے پناہ نعمت تسنے، دا ننا زی آ ٹی ءِ کہ نن دے و نن خواری کرسا دانعمت آتیان فائدہ ہرفن و اللہ تعالیٰ نا سجدہ ءِ کرسا شکر ءِ ادا کین۔ نن اللہ تعالیٰ نا اخس شکرءِ ادا کین کم ءِ۔ وزیراعظم پارے کہ بشام نا موسم اٹی شجرکاری مہم نا بنانا وخت آ ای تعلقدار کمامدارآتے مبارکبادی ایتیوہ و اومیت کیوہ کہ صوبائی حکومت آتون اواری اٹ مچ آپاکستان اٹی بنجائی حکومت و زموار آک اواری اٹ داعظیم کاریم اٹی تینا پبی کڑد ءِ ادا کیرہ و پاکستان ءِ کچٹی آن بچفنگ کن و داملک ءِ زیبا کننگ کن تینا پبی کڑد ءِ ادا کیرہ۔ وزیراعظم پارے کہ داڑے ننا چناک ہم ساڑی ءُ ہرا پاکستان نا تابناک آخبت نا ضمانت ءُ، دا بھلن مرسا زیور تعلیم آن آراستہ مرسا پاکستان نا عظیم معمار مریرہ، چناتے تعلیم تون کسب کار کینہ تانکہ او ملک انا گچین وڑٹ خذمت ءِ کننگ کیر۔
