حکومت ڈیجیٹل پاکستان کن سنبرینگوک، ملک ءِ شونداری و شونہالی نا کنڈآ دننگ کن ٹیکنالوجی المی ءِ، وزیر مملکت شزہ فاطمہ خواجہ

اسلام آباد۔ 07 اگست (اے پی پی) وزیر مملکت انفارمیشن ٹیکنالوجی و ٹیلی کمیونیکیشن شزہ فاطمہ خواجہ ڈیجیٹل پاکستان نا وژن نا پوروی کن حکومت نا عزم انا درشانی ءِ کرے و پارے کہ ملک ءِ شونداری و شونہالی نا کنڈآ دننگ کن ڈیجیٹل ٹیکنالوجی المی ءِ۔ داخیال آتا درشانی ءِ او چارشنبے نادے آ جی ایس ایم اے نا کنڈآن اولیکو نیشنل ڈیجیٹل سمٹ آن تران اٹی کرے۔ اوڈیجیٹل بدلی ءِ پک کننگ کن وزیراعظم شہباز شریف نا پارت آ کروک آ سوگو گام گیج آتے مون آتخا۔ اوناپاننگ ئس کہ ننا مسخت شاری و خلقی علاقہ غاتا نیام اٹ ڈیجیٹل بشخنگ ءِ چٹفنگ ءِ، زرگزران، گورننس و راج ءِ ڈیجیٹل کننگ اُن۔ وزیر مملکت پارے کہ ملک ءِ شونداری و شونہالی نا کنڈآ دننگ کن ڈیجیٹل ٹیکنالوجی المی ءِ، او ڈیجیٹل اختراعات و بنداوی پنجر نا شونداری کن برجاحکومتی کوشست آتے مو ن آ تخا۔ شزہ فاطمہ ملک انا زرگزرانی شونداری ٹی ٹیلی کام انڈسٹری نا اہم کڑد ءِ امنا کرسا پارےکہ اسہ بشخ اس ہم انفارمیشن اینڈ کمیونیکیشن ٹیکنالوجی (آئی سی ٹی) آن بیدس شون ہلنگ کپک۔ اوبشخ ہلوک آتے ملک انا تہہ ٹی آئی سی ٹی ءِ مون آ دننگ نا پدریسہ کوشست آتا بارواٹی معلومدار کرے ہرانا سوب آن تدوک آمالی سال اٹی آئی ٹی نا برآمد آتیٹی ریکارڈ ودکی مس۔ اونا پاننگ ئس کہ آئی ٹی نا بشخ اٹی ورناتیکن بھلو وارخواہی اس ساڑی ءِ، ساڑی آ دورانا خواست آتے پورو کننگ کن کسب آ تالان تعلیم نا مون آ دننگ المی ءِ۔ اوڈیجیٹلائزیشن نا کنڈآ اجتماعی کوشست آتیا زور شاغساپارینے کہ ڈیجیٹل نا بشخ ٹی صنفی شمولیت ننا اولیت ءِ۔