وزیراعظم شہباز شریف نا کماشی ٹی زرگزرانی بحالی، الس ءِ ریلیف تننگ کن کوشست کننگ اُن ، رانا مشہود احمد خان

اسلام آباد۔ 07 اگست (اے پی پی) چیئرمین وزیراعظم یوتھ پروگرام رانا مشہود احمد خان پارینے کہ وزیراعظم شہباز شریف نا کماشی ٹی زرگزرانی بحالی و الس ءِ ریلیف تننگ کن کوشست کننگ اُن، ورناتا لائخی تے کاریم اٹ اتنگ کن سنبرینگوک اُن، واکدار ورناک تینا خاہوت و ملک انا شونہالی ٹی اہم کڑد اس ادا کننگ کیرہ۔ داخیال آتا درشانی ءِ او چارشنبے نادے آ داڑے پریس کانفر نس کرسا کرے۔ اوپارےکہ کبینی 4 سال نا کم انگا  کچ آٹی ءِ، حکومت زرگزران ءِ تینا نت تیا سلفنگ کن گام گیج کننگ اٹی ءِ، غٹ زرگزرانی ٹک آ ک مثبت ءُ ، وزیراعظم شہباز شریف نا کماشی ٹی زرگزرانی بحالی، الس ءِ ریلیف تننگ کن کوشست کننگ اُن ، بروک آ منہ تُو اٹی کبینی ٹی پین کمتی بریک و الس ءِ ریلیف ملک۔ اوپارے کہ ورناتا لائخی تے کاریم اٹ اتنگ کن سنبرینگوک اُن، واکدار ورناک تینا خاہوت و ملک انا شونہالی ٹی اہم  ءُ کڑد اس اداکننگ کیرہ داڑکن حکومت ورناتے واکدار کننگ کن پبی گام گیج کننگ اٹی ءِ۔ اوپارے کہ پاکستان دولت مشترکہ تون فعال وڑاٹ اواری اٹ کاریم کننگ ءِ، 2017 اسکان  پاکستان اٹ چین اتون اوار ایلو ملک آک زرکاری کریرہ، 2017 آن 2024نا نیام اٹ پاکستان اٹ ہچ ءُ زرکاری اس بتنے ہرانا ننے بھاز زیات نسخان ہرفوئی تما، حکومتی گام گیج آتا سوب آن مچ آ دنیا نا زرکارآک پاکستان نا پلو ءِ ہلنگ ءُ۔ اوپارے کہ دولت مشترکہ نا سیکرٹری جنرل پیٹریشیا سکاٹ لینڈ پاکستان نا دورہ ءِ کرے، دولت مشترکہ نا سیکرٹری جنرل نا دورہ ءِ پاکستان بھا زبے سہب ئس، چندی معاہدہ و مفاہمت نا یات داشت آتیا دستخط کننگا اونا اثرآک زوت مون آ بریرہ، پاکستان دولت مشترکہ تون مصنوعی ذہانت اٹی کمکاری نا معاہدہ کرینے، 12 اگست آ جہانی یوم نوجوانان آ اونا باقاعدہ بناءِ کننگک۔ اوپارے کہ دولت مشترکہ نا یوتھ منسٹرز نا ٹاسک فورس نا چیئرمین شپ پاکستان تون ءِ، دا ٹاسک فورس انا رداٹ دولت مشترکہ نا 56 باسک ملک آتا وزیرتعلیم گوازی و صنعت بروک آ سال پاکستان نادورہ ءِ کیرہ، داڑآن دا ملک آتا نیام اٹ واپار وکاروبار نا وارخواہی ودی مریک۔ اوپارے کہ یوتھ پارلیمنٹرین فورم نا دولت مشترکہ تون شریداری ءِ کننگانے، دا فورم نا باسک 56 ملک آتا پارلیمنٹ نا باسک آتیان آزموندہ غاتے اسہ ایلو ءِ تننگ کیرہ۔ اوپار ے کہ قومی رضاکار کور گراس روٹ لیول آ کاریم کیک، داورناک موسمیاتی بدلی ، شجرکاری تعلیم تون اوار ایلو بشخ آتیکن ہندی کہول آ کاریم کیرہ، اوپارے کہ مچ آ ملک آن ورناک قومی رضاکار کورانا لوگو نا گچین کاری کن 850 ڈیزین مون تسر ولے کوئٹہ نا مسڑاسے نا لوگو ءِ کمیٹی گچین کرے۔ اوپارے کہ پاکستان سہی کنڈآ ہِننگ ءِ ، ورناک تینا قسمت ءِ بدل کننگ کن سنبرینگوک ءُ۔ دنیا ٹی پاکستانی کسبکار افرادی قوت نا خواست10 آن 15 لکھ  ءِ، برجاسال 2 لکھ 60 ہزار ورناتے براہ راست و 6 آن 8 لکھ ورناتے بالواسطہ وڑاٹ کسبکار کننگ نا تربیت تننگک۔ اوپارے کہ پیشن نا ملک ہنوک آ ورناتے کسب اتون اوار اوار اخلاقیات نا تربیت ہم تننگک تانکہ او گچین کڑد اٹ پاکستان نا پن ِ ءِ روشنا کیر داڑآن پاکستانی ورناتیکن پین وارخواہی ودی مریک، داورناتے کریش لینگویج کورسز ہم کرفنگک۔ اوپارے کہ وزیراعظم یوتھ لون اسکیم 2013ٹی نواز شریف بناءِ کرے، 2013 آن 2022اسکان دا پروگرام نا رداٹ 75 ارب روپئی نا وام تننگا ولے 2023اٹی ورناتے واکدار کننگ کن 54 ارب روپئی نا وام تننگا ہراڑآن اسہ لکھ 76 ہزار ورناک فائدہ ہرفیر۔ اوپارے کہ برجاتُو انا ایسر اسکان وزیراعظم یوتھ لون اسکیم نا دُوارہ بناءِ کننگک ۔ 3لکھ ورناتیٹی 100 ارب روپئی نا وام بشخنگک، داوام تا واپسی نا کچ 97 درسد ءِ داڑآن ملکی زرگزران ءِ 900 ارب روپئی نافائدہ مسنے، داورناک 30 ہزار ملازمت فراوان کرینو۔ اوپارے کہ ساڑی حکومت نا پامدار گام گیج آتا سوب آن آئی ٹی نا برآمد آتیٹی نمان ودکی مسنےا نتئے کہ حکومت آئی ٹی نا مون آ دننگ آ چکار کرینے۔