اسلام آباد۔ 06 اگست (اے پی پی) قومی اسمبلی گچین کاری (ارٹ میکو ترمیم ) بل 2024 ء نا منظوری ءِ تسنے، ہرانا رداٹ مقررہ آئینی مدآن پد اسہ باسک اس ہم اسہ جماعت اسے ٹی اوار مننگ آن پد پین جماعت اسے ٹی اوار مننگ کپک، ہرا جماعت مخصوص نشست آتیکن تینا اولیت فہرست جمع کرفپک او مخصوص نشست آتا اہل مفک، ریٹرننگ آفیسر تون پارٹی ٹکٹ جمع کرفپروک آ اومیتدار آجو تصور مریک۔ سے شنبے نادے آ قومی اسمبلی ٹی قائمہ کمیٹی پارلیمانی امور راناارادت شریف خان گچین کاری (ارٹ میکو ترمیم)بل 2024ء آ کمیٹی نا رپورٹ ءِ ایوان اٹ پیش کرے۔ بلال اظہر کیانی تحریک پیش کرے کہ گچین کاری (ارٹ میکو ترمیم) بل 2024ء آ سجفنگ کن تعلقدار قاعدہ معطل کننگے۔ ایوان آن تحریک نا منظوری آن پد بلال اظہرکیانی تحریک پیش کرے کہ گچین کاری (ارٹ میکو ترمیم) بل 2024ء آ قائمہ کمیٹی نا رپورٹ کروک دروشم اٹ دمدستی سجفنگے۔ سنی اتحاد کونسل نا باسک صاحبزادہ صبغت اللہ و علی محمد خان بل اٹی ترمیم پیش کریر ہرافتا وزیر کانود و پارلیمانی امور اعظم نذیر تارڑ مخالفت ءِ کرے۔ سنی اتحاد کونسل نا باسک صاحبزادہ صبغت اللہ پارے کہ داایکٹ آئین نا آرٹیکل 119 و 112 نا خلا ف ورزی و آئین آن چپ ءِ۔ نن سمجھنہ کہ بل انا جاچ ءِ ہلنگ کن اودے گیشتر بنداو سلیکٹ کمیٹی نا حوالہ کننگے۔ علی محمد خان تینا ترمیم نا حق اٹی دلیل ترسا پارے کہ پارلیمنٹ ءِ سیاسی مسخت آتیکن کاریم اٹ اتنگ سہی اف۔ اینو کنے اگہ تینا حق ملنگ ءِ تو پگہ ہم کنے داحق آن محروم کننگ مفک۔ داحق ننے سپریم کورٹ نا فیصلہ غان پد ملانے دابل ءِ مسترد کینہ، کانود سازی ملک انابایدے فائدہ ٹی مرے، دابل انا برخلاف نن سپریم کورٹ آ کانہ۔ ہرانا ورندی ٹی وزیر کانود اعظم نذیر تارڑ پارے کہ کانو دسازی دامقدس ایوان نا اختیار ءِ، و داکانود سازی ءِ آئین نا رداٹ ءِ۔ دا ترمیم کس اسے نا کسر ءِ توننگ کن اف، اوفتا 81 باسک اللہ ءِ حاضر و ناظر کرسا دا سوغند نامہ جمع کرفیسر کہ اوفتا تعلق پی ٹی آئی آن اف بلکن سنی اتحاد کونسل آن ءِ۔ اعظم نذیر تارڑ پارے کہ آئین نا آرٹیکل 51 و106 نا رداٹ ہندن ءُ جماعت اس ہرا دا پلیٹ فارم آن گچین کاری تیٹی بشخ ہی ہلتنے اودے مخصوص نشست تننگ مفک، ایوان آن بل آ اولیکو خواندگی نا تحریک منظور مننگ آن پد اسپیکر اسٹ آن پد ایلو بل انا غٹ شق آتا ایوان آن منظوری ءِ ہلک۔ بل اٹی بلال اظہرکیانی و زیب جعفر تحریک پیش کریر ہرافتا وزیرکانود اعظم نذیر تارڑ مخالفت ءِ کرے۔ ایوان آن ترمیم منظور مننگ آن پد بل اٹ اوار کننگا۔ بلال اظہر کیانی پارے ک ہراترمیم آتے اتنگانے دا مہالو آن آئین اٹی نوشتہ ءُ، اسہ اومیتدار اس ہم ریٹرننگ آفیسر تون پارٹی ٹکٹ جمع کرفپک تو او آجو اومیتدار تصور مریک، ارٹ میکو ترمیم دادے کہ تخوک آ وخت اسکان اگہ سیاسی جماعت اس تینا مخصوص نشست آتا اولیت نشست جمع کرفپک تو او مخصوص نشست آتا اہل اف وخت اس کہ داکان بیدس مسٹ میکو ترمیم دادے کہ اگہ اسہ وار آجواومیتدار اس گچین مننگ آن پد جماعت اسے ٹی شمولیت اختیار کیک تو او ولدا پین جماعت اسے ٹی اوار مننگ کپک، داشق آک آئین وکانود اٹی ساڑی ءُ۔ بلال اظہر کیانی تحریک پیش کرے کہ گچین کاری (ارٹ میکو ترمیم) بل 2024 ء ءِ منظور کننگے۔ قومی اسمبلی بل انا منظوری ءِ تس۔
