اسلام آباد۔ 06 اگست (اے پی پی) بنجائی وزیر خزانہ و محصولات سینیٹر محمد اورنگزیب پارینے کہ موسمیاتی بدلی تتون مون تننگ کن گچین ڈٹ جوڑ کننگ نا گرج ءِ، موسمیاتی فنانسنگ اٹ نجی بشخ ءِ اہم کڑد ادا کروئی مریک۔ اوداہیت ءِ سے شنبے نادے آ داڑے اکیومن پاکستان نا کنڈآن کلائمیٹ ایکشن فار پاکستان نا سرحال آ اڈ ہلوک دود آن تران کرسا پارے۔ وزیرخزانہ پارے کہ موسمیاتی بدلی جہانی درشانی ءِ و داڑآن دنیا نا چندی ڈیہہ زہمی مننگ اٹی ءُ۔ پاکستان موسمیاتی بدلی تیان زہمی مروک آ سرفہرست ملک آتیٹی اوار ءِ۔ اوپارے کہ 2022 اٹی موسمیاتی بدلی تا سوب آن پاکستان اٹ نوکاپ نانتیجہ ٹی بھلو کچ اسے آ بھسکاری مس۔ دانوکاپ آن پاکستان ءِ 30 ارب ڈالر آن زیات نا نسخان رسینگا نے۔ وزیرخزانہ پارے کہ جنیوا کانفرنس ٹی چندی ملک آک ہڑتوم آکنڈآتا و کثیر الجہتی شریدار و جہانی ادارہ غاک پاکستان کن کم و ود 9 ارب ڈالر آن زیات نا کمکاری نا پڑو کرے ولے پاکستانءِ پڑوکروک کمکاری نا رداٹ فنڈ ملتو۔ اوپارے کہ موسمیاتی فنانسنگ کن گچین ڈٹ جوڑ کننگ نا گرج ءِ۔ موسمیاتی فنانسنگ اٹ نجی بشخ ءِ تینا اہم کڑد ءِ ادا کروئی مریک و دا بابت نجی بشخ بایدے قائدانہ کڑد اداکے۔ وزیرخزانہ پارے کہ آئی ایم ایف نا انتظامی بورڈ اٹ موسمیاتی فنانسنگ نا بابت ہم گپ وتران مریک۔ ننے اومیت ءِ کہ برجاتُو انا ایسر اسکان آئی ایم ایف نا انتظامی بورڈ سٹاف لیول معاہدہ نا منظوری ءِ ایتک۔ وزیرخزانہ پارے کہ پاکستان نا زرگزران سوگوی نا کنڈآ ہِننگ ءِ۔ پائیدار اقتصادی نمو و شونداری کن اصلاحات نا عمل برجاسلک۔ اوپارے کہ سوگو زرگزران کن خراج نا نظام اٹی وسعت، نظام اٹی شفافیت، توانائی بشخ اٹی اصلاحات و گورننس اٹی گچینی اتنگ المی ءِ۔ حکومت دا بابت گام گیج کننگ اٹی ءِ۔ وزیرخزانہ پارے کہ آبادی ٹی ودکی اتون اوار اوار وسیلہ غاتیٹی ودکی المی ءِ۔ پاکستان ءِ آبادی ءِ کنٹرول کننگ کن گام گیج کروئی مریک۔
