اسلام آباد۔ 30مئی (اے پی پی)بروک آ مالی سال اکن بنجائی بجٹ ئِ 3جون آ پیش کننگ نا گمان ارے، مسلم لیگ (ن) نا حکومت ئِ اولیکو وار چارمیکوبجٹ پیش کننگ نا اعزاز دوئی مریک۔ اقتصادی چائندارتا رداٹ مسلم لیگ (ن) نا حکومت مسکوہی مسہ سال آتیٹی دھرنہ و ایلو ویل آتا باوجود معیشت ئِ درست سمت اٹی روان کننگ کن اہم سرسہبی دوئی کرینو و ہراجہانی ادارہ غاک جون 2013ءاسکان پاکستان نا ڈیفالٹ کننگ نا واننگ تسرہ اینو ہموک جیٹرو، موڈیز، آئی ایف آر، ایشیاءمورگن، اسٹینلے و فوربز پاکستانی معیشت نا منفی آن مثبت و مثبت آن سوگو مننگ نا رپورٹ آتے تننگ ئُ۔ ملک آتا معیشت آ نظر تخوک آ دا ادارہ غاتا کنڈآن پاکستانی معیشت نا شون نا اعتراف کننگانے انتئے کہ معیشت نا حساب وکتاب داہیت انا شاہدی ئِ ترسا نظر بریک کہ صرف مسہ سال مست پاکستان نا شون ناکچ 3درسد آن کم ئس ہراداسا ودسا چارئُ نیم درسد آن زیات مسنے م، 324ارب روپئی نا شونداری بجٹ اٹی غیر معمولی ودکی مسنے ہراداسا ودسا 1675ارب روپئی اسکان رسینگانے ، محاصل نا وصولی ناہدف 1946ارب روپئی آن ودسا 3100 ارب روپئی اسکان رسینگانے ہرانا سوب خراج ٹو جی ڈی پی نا کچ 8.45درسد آن ودسا 10درسد اسکان بسنے ہرادے بروک آ اِراسال آتیٹی 13آن 15درسد اتنگ نا ہدف مقرر کننگانے۔ مسہ سال مست کبینی نا کچ 12درسد ئس ہراداسا کم مرسا 2.79درسد اسکان بسنے، درملکی زرمبادلہ ناکوڑی 3سال مست 2ارب82کروڑ 90لکھ ڈالر ئس ہراودسا 21ارب ڈالر اسکان بسنے، ساڑی آ حکومت نا گچین اقتصادی پالیسی تیا ن مسہ سال مست پیشن نا ملک پاکستانی تا کنڈآن ترسیلات زر 13ارب 92کروڑ ڈالر ئس ہرا داسا 16ارب3کروڑ ڈالر اسکان رسینگانے ، نجی بشخ ہرامسہ سال مست وام ہلسا کاروبار کننگ آ تیار ہلوکہ و دا کچ منفی ئس ولے اینو نجی بشخ انا کنڈآن 300 ارب روپئی نا وام ہلنگ آن کاروباری سرجزآتے سوگوی دوئی مسنے ہراڑآن خلقت آتے روزگار نا وارخواہی ہم دوبسنے، کشاری بشخ اٹی برجاءکروک آ وام تیٹی 336ارب روپئی آن 600 ارب روپئی اسکان بھلو ودیکی اس ریکارڈ کننگانے ہندا وڑ راجی بشخ اٹی خلقت آتا شرحالی کن خڑچ کروک آ زر ئِ 40ارب روپئی آن ودسا 105ارب روپئی اسکان ہنانے سرمسنے۔ چاہندارآتا رداٹ ملکی تاریخ اٹی اولیکو وار آئی ایم ایف تون 11سہ ماہی پروگرام پورو کننگانے و اقتصادی اصلاحات آ عملدرآمد جاری ئِ، اومیت کننگ انگ ئِ کہ بروک آ مالی سال انا بجٹ مسکوہی مسہ سال آتا مقابلہ ٹی الس دوست بجٹ مریک و داڑآن ملک اٹی کبینی نا کچ اٹی کمتی تون اوار اوار اقتصادی اصلاحات و ملک ئِ شون نا کسر آ روان کننگ اٹی کمک رسینگک۔
