اسلام آباد۔ 06 اگست (اے پی پی) وزیراعظم نا کوآرڈی نیٹر جان جوڑی ڈاکٹر مختار احمد بھرتھ پارینےکہ جان جوڑی نا بشخ اٹی گچینی و اصلاحات ننا ایجنڈا و مشن ءِ، پاکستان انسٹیٹیوٹ آف میڈیکل سائنسز (پمز) اٹی روبوٹک سرجری درستی راستی کرفنگ نا فیصلہ کننگانے، سرجری نا بشخ اٹی شونداری کن 1465 ملین نا پی سی ون منظور کننگانے۔ وزارت جان جوڑی آن جاری بیان نا رداٹ ڈاکٹر مختار احمد بھرتھ پارے کہ سرکاری ہسپتال آتے پوسکن آ وڑتتون ہم گرنچ کننگ کن اہم گام گیج کننگ انگ ءِ، پمز ہسپتال اٹی روبوٹک سرجری درستی راستی کرفنگ نا ہم فیصلہ کننگانے۔ اوپارے کہ سرجری نا بشخ اٹی شونداری کن 1465 ملین نا پی سی ون منظور کننگانے، سرجن آتے جان جوڑی نا بشخ اٹی پوسکن آ تکنیکی آسراتی تتون ہم گرنچ کننگک، دا ڈٹ اٹی روبوٹک سرجری اتون ساڑی آ سرجیکل سروس آتے ہم اپ گریڈ کننگک۔ اونا پاننگ ئس کہ سرجن آتے بڑزکو مہارت نا تربیت تننگ کن غٹ تر المی گام گیج کننگک۔ ناجوڑ پوسکن آ درمان نا آپشن تیان فائدہ ہرفنگ کیک، ڈاکٹر مختار احمد بھرتھ پارے کہ جان جوڑی نا بشخ اٹی درملکی زرمبادلہ نا کٹیاٹی خاطرخواہ ودکی کننگ ہم وخت انا گرج ءِ، شون ہلوک ملک آتیٹی ملازمت آتا دوئی کننگ و روبوٹک سرجری ٹی تربیت یافتہ کسبکار افرادی قوت نا وارخواہی دوبریک، اونا پاننگ ئس کہ السءِبڑزکو آب انا طبی آسراتی تا فراوانی ننا اولیتءِ۔
