اسلام آباد۔ 06 اگست (اے پی پی) بنجائی وزیر کانود و پارلیمانی امور اعظم نذیر تارڑ پارینے کہ بروک آ تُو (ستمبر) ناایسر اسکان پاسپورٹ نا پرنٹنگ نا لائخی ءِ ودفسا ہڑدے ئی 55 آن 60 ہزار مریک اوکان پد پاسپورٹ نا جاری کننگ اٹ تاخیر نا ویل ایسر مریک۔ سے شنبے نادے آ قومی اسمبلی نا دیوان اٹی آغا سید رفیع اللہ و سحرکامران نا پاسپورٹ نا جاری کننگ اٹ تاخیر نا بابت چکاری نوٹس نا ورندی ءِ ترسا وزیر پارلیمانی امور سینیٹر اعظم نذیر تارڑ پارے کہ 2004ء ٹی داوخت انا گرج آتا رداٹ مشینری و سافٹ ویئر خلنگاسس ولے داسہ پاسپورٹ نا ڈیمانڈ ودسا ہڑدے ئی 45 ہزار مسنے، داکان بیدس مشن تا کچ ہم 20 آن ودسا 92 مسنے و پاسپورٹ نا دفترآک ہم ودانو، داگرج آتے مو ن آتخسا پوسکن آ مشینری و پوسکن ءُ پرنٹر درآمد کننگ کن ٹینڈر کننگانے، بروک آ تُو ستمبر نا ایسر اسکان دا سسٹم کاریم نا بناءِ کیک اوکان پد ہڑدے ئی 26 ہزار نا جاگہ غا 55 آن 60 ہزار پاسپورٹ تیار مننگ بناکیک۔ چکاری نوٹس آ آغا سید رفیع اللہ و سحرکامران نا کنڈآن چست کروک سوج آتا ورندی ءِ ترسا وزیر پارلیمانی امور اعظم نذیر تارڑ پارے کہ حکومت دا باندات آ دمدستی ایکشن ہلکونن، اگہ کارروائی اس کننگپروسس تو ولدا چکاری نوٹس ءِ کمیٹی نا دوٹی تننگ آ ہچ ءُ اعتراض اس متوکہ۔ اوپارےے کہ ستمبر نا ایسر اسکان دا ازباب آتا خلنگ بناکیک اوکان پد پاسپورٹ نا پرنٹنگ نا کچ ہم ودک۔ اسہ پین سوج اسے نا ورندی ٹی اوپارے کہ بلاشبہ سیاہی و لیمینٹڈ پیپرنا ویل آک ئسر ہرافتے ایسر کننگ انگ ءِ، بروک آ2 تُو اٹی حالیت جوان مریک۔
