اسلام آباد۔ 06 اگست (اے پی پی) بنجائی وزیر نیشنل فوڈ سیکورٹی اینڈ ریسرچ رانا تنویرحسین پارینے کہ کشاری بشخ اٹی پدریسہ جدت و شونداری پاکستان نا زرگزرانی سوگوی کن المی ءِ۔ داخیال آتا درشانی ءِ او سے شنبےنادے آ پاکستان اٹی فوڈ اینڈ ایگریکلچرآرگنائزیشن نا نمائندہ فلورنس رولے تون اوڑدہی ٹی گپ وتران کرسا کرے۔ اوڑدہی ٹی فوڈ سیکورٹی و کشاری شونداری نا بابت امور آ سجفنگا۔ بنجائی وزیر پارے کہ کشت وکشارنا شونداری پاکستان ءِ مون تروک بھاز انگا زرگزرانی ویل آتا ایسرءِ، کشت وکشار ملک اٹی شونہالی ، غذائی رکھ و راجی و اقتصادی شونداری کن بھاز اہمیت تخک، کشاری بشخ اٹی پدریسہ جدت وشونداری پاکستان نا زرگزرانی سوگوی کن المی ءِ۔ اوپارے کہ پاکستان اٹی فوڈ اینڈ ایگریکلچرل آرگنائزیشن نا کڑد بھاز است بڈءِ، کشت وکشار نا شونداری حکومت نا اولیت ءِ، حکومت بزغرآتا آسراتی کن چندی پروگرام تابناءِ کرینے، پوسکن آ فصل آتا پیدوار نا بابت بزغرآتا کاریم نا کچ ءِ ودفنگ کن اوفتا راہشونی نا گرج ءِ۔ رانا تنویر حسین پارے کہ ایف اے او کشت وکشار نا شونداری و پیدوار آ موسمیاتی بدلی نا اثرآتے کم کننگ کن راہشونی مہیا کننگ کیک۔ داوخت آ گپ وتران کرسا فوڈ اینڈ ایگریکلچرل آرگنائزیشن نا نمائندہ فلورنس رولے پارے کہ فوڈ اینڈ ایگریکلچرل آرگنائزیشن پاکستان اٹ کشاری بشخ ءِ مون آ دننگ کن تینا کمکاری ءِ برجاتخک، پاکستان اٹ بزغرو پولکار آتا لائخی تے ودفنگ آ اواری اٹ کننگ اُن۔ اوپارے کہ کشاری بشخ اٹی موسمیاتی بدلی نا اثرآتے کم کننگ کن ایلو اسٹیک ہولڈر آتون اواری اٹ ہم کاریم کننگ اُن۔
