لاہور۔5اگست (اے پی پی): مزن وزیر محمد شہباز شریف ءَ گشتگ کہ میرٹ ءُ ساپ ءُ صلہی ءَ ا بید ایچ پڑءَ دیمروئی بوت نہ کنت، کرکٹ اسٹیڈیمز ءَ را جدید کنگءِ باز ضلورت ایں، حکومت لیب ء ُ گوازیاناں دیمروئی دئیگءِ ھاترءَ درائیں آسراتی ءَ کارمرز کنگءَ ایں، کرکٹ یا ہاکی ءِ لیب ءِ یاتاناں یک رندے پدا تازگ کنگ لوٹ ایت، لیب ءِ چاروکاناں لیب ءِ گہتری ءِ حوالگءَ بازیں اُمیت اَست، زوت لیب ءِ پڑءَ وتی پیسرگیں ارزشت ءَ یک رندے پدا واتر کاراں۔ آئی ءَ اے ھیالانی درشانی دوشمبے ءِ روچءَ قذافی اسٹیڈیم لاہور ءِ نوک جوڑ کنگءِ بُن اِشت ایر کنگءِ حوالگءَ جم داشتگیں مراگش ءَ گوں تران کنان ءَ کتگ۔ اے موہ ءَ تئی کارانی وزیر ءُ چیئرمین پی سی بی محسن نقوی، حال ءُ اھیوال کاری ءُ شنگکاری ءِ بنجاہی وزیر عطاء اللہ تارڑ، پنجاپ اسمبلی ءِ اسپیکر ملک احمد خان، سینئر صوبائی وزیر مریم اورنگزیب ءُ ایندگہ مردم ہم ساڑی بوتگ اَنت۔ مزن وزیر محمد شہباز شریف ءَ گشتگ کہ حکومت لیب ء ُ گوازیاناں دیمروئی دئیگءَ گامگیج چست کنگءَ ایں، مئے ورناہ آنی تہا بازیں ٹیلنٹ اَست، وائشت ایں کہ ما لیب ءُ گوازی ءِ پڑءَ وتی پیسرگیں بستارءَ واتر بہ کن اَنت۔ آئیءَ گشتگ کہ بے میرٹءَ ایچ پڑءَ دیمرو ئی بوت بہ کنت۔ محمد شہبا ز شریف ءَ گوستءِ حوالگءَ گشتگ کہ 50 ءَ چہ 80 ءِ دہک ءَ لیبانی پڑءَ مئے نام بوتگ، بلے بدبھتی ءَ چہ سفارشی کلچر ءَ لیباں ہوار ایندگہ پڑآناں نقصان داتگ۔ آئیءَ گشتگ کہ کرکٹ اسٹیڈیمز ءَ را نوک جوڑ کنگءِ باز ضلورت ایں، منءَ وشی بوت کہ چیئرمین پی سی بی محسن نقویءَ قذافی اسٹیڈیم ءِ نوک جوڑ کنگءُ انفراسٹرکچر ءَ را نوک کنگءِ ھاترءَ گامگیج چست کتگ، اے منصوبہ ہم زوت سرجم کنگ بیت۔ مزن وزیر محمد شہباز شریفءَ محسن نقوی ءَ را گشتگ کہ انچش کہ شما قذافی اسٹیڈیم ءَ را نوک جوڑ کنگءَ اِت،ہمے وڑءَ راجی ٹیم ءَ را نوک درچینگ بہ بیت، کرکٹ ءِ سرءَ سرجمءَ دگلوشی دیئگ بہ بیت، تنا میرٹ ءِ سرءَ لیبی درچینگ بہ بنت۔ لیبیانی نوک درچینگ یک مزنیں سومندی بیت۔ آئی ءَ گشتگ کہ ٹیمءِ تہا لیبی آنی گچین کنگءِ تہا ایچ وڑیں سفارش منگ مہ بیت، اگاں مزن وزیر ہم سفارش بہ آئی ءِ ہم گپ زورگ مہ بیت۔ تنا میرٹ چارگ بہ بیت، چیا کہ سفارشی کلچرءِ ہلاس کنگءَ کرکٹ، ہاکی ءَ ہوار ایندگہ لیبانی تہا ملک ءِ نام روژناہ کنگ بیت۔ مزن وزیرءَ گوستءِ یک قصہ بیان کتگ ءُ گشتگ کہ وہدے ٹیم میدان ءَ ایر کپیت گڑا آیانی پُشتءَ مات، گہار، برات ءُ سرجمیں راجءِ دعا گون بنت، لیب ءِ چاروکاناں لیب ءِ گہتری ءِ ھاترءَ بازیں اُمیت اَست، منءَ اُمیت ایں کہ مہ زوتاں چہ زوت لیب ءِ پڑءَ وتی پیسرگیں ارزشستءُ بستارءَ واتر کاراں ۔
